कानगाव येथील शाळेच्या आवारात मोकाट जनावरांचा वावर

कानगाव, ता. ५ : कानगाव (ता. दौंड) येथील जिल्हा परिषद प्राथमिक शाळेच्या आवारात मोकाट जनावरे आणि भटक्या कुत्र्यांचा प्रश्न दिवसेंदिवस गंभीर होत चालला आहे. यामुळे नागरिकांमध्ये विशेषतः पालकांमध्ये भीतीचे वातावरण पसरले असून प्रशासनाने या समस्येवर तातडीने तोडगा काढावा अशी मागणी जोर धरू लागली आहे. शाळा चालू असताना मोकाट जनावरे गायी, भटकी कुत्री शाळेच्या आवारात फिरत आहेत. यामुळे विद्यार्थ्यांवर या जनावरांकडून हल्ले होण्याची शक्यता आहे. शाळेच्या परिसरात या जनावरांच्या मलमूत्रामुळे दुर्गंधी पसरून अस्वच्छताही वाढून मुलांच्या आरोग्याचा प्रश्न निर्माण होत आहे. पावसाळ्याच्या दिवसांत ही जनावरे शाळेच्या इमारतींमध्ये किंवा शाळेच्या आवारात आश्रय घेत असल्यामुळे शाळेचे कामकाज बाधित होत आहे.
शाळा व्यवस्थापन समितीने व पालकांनी ग्रामपंचायतीकडे शाळेला संरक्षण भिंत बांधण्यासाठी अर्ज करूनही कोणतीही ठोस कार्यवाही होत नाही असा संताप पालकांकडून व्यक्त केला जात आहे. केवळ कागदी घोडे नाचवले जात असल्याची टीका होत आहे. मोकाट जनावरांचा बंदोबस्त करण्यासाठी तातडीने उपाययोजना कराव्यात, ही जनावरे पकडावीत आणि त्यांच्या मालकांवर दंडात्मक कारवाई करावी, अशी मागणी नागरिक व पालकांकडून होत आहे.