शासकीय योजनांच्या लाभासाठी महसूल सप्ताहात सहभाग घ्या

केसनंद, ता.१ : पूर्वहवेलीत अधिकाधिक नागरिकांना शासकीय योजनांची माहिती व योजनांचा लाभ मिळावा, यासाठी १ ते ७ ऑगस्ट २०२५ दरम्यान राबविण्यात येणाऱ्या महसूल सप्ताहास प्रारंभ झाला असून, या उपक्रमात जास्तीत जास्त नागरिकांनी सहभागी व्हावे, असे आवाहन लोणीकाळभोर अपर तहसीलदार कार्यालयाच्या वतीने करण्यात आले आहे.
महसूल विभागाच्या वतीने दरवर्षी महसूल दिनाचे आयोजन करण्यात येते. या निमित्ताने शासकीय योजनांची माहिती व प्रत्यक्ष लाभ अधिकाधिक नागरिकांना मिळावा, यासाठी पूर्वहवेलीत लोणीकाळभोर अपर तहसीलदार कार्यालय यांच्या अधिपत्याखालील लोणीकाळभोर, थेऊर, लोणीकंद, ऊरुळीकांचन, अष्टापूर आणि वाघोली या सहा महसूल मंडळांमध्ये महसूल सप्ताह साजरा करण्यात येत आहे.
महसूल सप्ताहामध्ये उत्कृष्ट महसूल कर्मचाऱ्यांचा सत्कार, सन २०११ पूर्वीच्या अतिक्रमणांचे नियमितीकरणासाठी प्रस्ताव तयार करणे, पाणंद, शिव रस्त्यांची मोजणी, अतिक्रमण मुक्ती आणि झाडे लागवड.
छत्रपती शिवाजी महाराज महाराजस्व अभियान, विविध योजनांचे लाभ व दाखले वाटप,विशेष सहाय्य योजनेत थेट लाभ हस्तांतरण, (डीबीटी) न झालेल्या लाभार्थ्यांना अनुदान वाटप, यासह विविध उपक्रम मंडल कार्यालयात राबवण्यात येणार असून नागरिकांनी या उपक्रमात सहभागी व्हावे, असे आवाहन प्रशासनातर्फे करण्यात आले आहे.