तुळापूर परिसरातील हातभट्टी लोणीकंद पोलिसांकडून उदध्वस्त

केसनंद, ता. १२ : लोणीकंद पोलिसांनी तुळापूर (ता. हवेली) गावच्या हद्दीत छापा टाकत हातभट्टी उदध्वस्त करून १० लाख १५ हजार रुपये किमतीच्या मुद्देमालासह दोघांना अटक केली.
या कारवाईत पोलिसांनी सचिन संभाजी राखपसरे (वय ३०, रा. राखपसरे वस्ती, पाण्याचे टाकीजवळ, लोहगाव) व प्रदीपकुमार हरीलाल निषाद (वय ३०, रा. राखपसरे वस्ती, पाण्याचे टाकीजवळ, लोहगाव) यांना अटक केली असून, न्यायालयाने त्यांना दोन दिवसांची पोलिस कोठडी सुनावली आहे.
याबाबत लोणीकंद पोलिसांनी दिलेल्या माहितीनुसार, लोणीकंद पोलिस ठाण्याच्या हद्दीत अवैध गावठी हातभट्ट्या लावणारे व गावठी दारू विक्री करणाऱ्यांबाबत मिळालेल्या माहितीनुसार वरिष्ठ पोलिस निरीक्षक सर्जेराव कुंभार यांच्या मार्गदर्शनाखाली लोणीकंद पोलिसांनी इंद्रायणी नदीकिनारी मोकळ्या जागेत हातभट्टीची गावठी दारू तयार करणाऱ्या अड्ड्यावर छापा टाकला. या कारवाईत गावठी दारू तयार करण्यासाठी लागणारे १२ हजार लिटर रसायन व हातभट्टी लावण्यासाठी लागणारे वेगवेगळे साहित्य, ५६० लिटर गावठी तयार दारू, तसेच टेम्पो असा एकूण १० लाख १५ हजार रुपये किमतीचा मुद्देमालही जप्त केला आहे.
ही कारवाई परिमंडळ चारचे पोलिस उपआयुक्त सोमय मुंडे, सहाय्यक आयुक्त प्रांजली सोनवणे यांच्या मार्गदर्शनाखाली लोणीकंद पोलिस ठाण्याचे वरिष्ठ पोलिस निरीक्षक सर्जेराव कुंभार, तपास पथकाचे पोलिस उपनिरीक्षक अर्जुन बेंदगुडे, पोलिस अंमलदार स्वप्नील जाधव, कैलास साळुंके, सागर जगताप, संतोष अंदुरे, मल्हारी सपुरे, शुभम चिनके, सुधीर शिवले, किरण पलांडे, अमोल ढोणे यांनी केली.