वाडेबोल्हाई येथे येत्या बुधवारी ‘वॉटर मीटर हटाव’बाबत बैठक

केसनंद, ता.४ : मुळा-मूठा नदी लगतच्या कृषिपंपांना वॉटर मीटर लावून भरमसाट पाणी पट्टी वसूल करण्याच्या पाटबंधारे विभागाच्या निर्णयाविरुद्ध २२ गावांतील शेतकऱ्यांनी
‘वॉटर मीटर हटाव’ आंदोलन केले होते. याप्रकरणी उच्च न्यायालयाने दिलेल्या निर्णयावर चर्चा करण्यासाठी येत्या बुधवारी (ता. ८) वाडेबोल्हाई येथे बैठकीचे आयोजन करण्यात आल्याची माहिती कृती समितीचे सचिव अंकुश कोतवाल यांनी दिली.
पूर्वहवेलीत मांजरीपासून - हिंगणगावपर्यंत मुळा-मुठा नदीकाठच्या कृषिपंपांना वॉटर मीटर लावून नदीतील सांडपाणी मिश्रित पाण्यावर भरमसाट पाणीपट्टी वसूल करण्याची मोहीम पाटबंधारे विभागाने सुरू केली होती. या निर्णयाला विरोध करण्यासाठी पूर्व हवेलीतील २२ गावातील शेतकऱ्यांनी एकत्र येत ‘मीटर हटाव - शेतकरी बचाव कृती समिती’ स्थापन करून विविध आंदोलनांसह न्यायालयीन लढाही दिला होता. या प्रश्नी शेतकऱ्यांच्या कृती समितीने मुंबई उच्च न्यायालयात दाखल केलेल्या जनहित याचिकेवर उच्च न्यायालयाने सकारात्मक निर्णय दिल्याने आंदोलक शेतकऱ्यांना दिलासा मिळाला आहे.