वढू खुर्द येथे बिबट्या जेरबंद

केसनंद, ता. २३ : अनेक पाळीव प्राण्यांचा फडशा पाडल्याने वढू खुर्द (ता. हवेली) परिसरात प्रचंड दहशत पसरली होती. अखेर मंगळवारी (ता. २३) सकाळी बिबट्या जेरबंद झाल्याने नागरिकांना काहीसा दिलासा मिळाला आहे.
पूर्व हवेलीतील वढू खुर्द व परिसरात गेल्या अनेक दिवसांपासून बिबट्यांचा वावर तसेच पाळीव प्राण्यांवरील हल्ले वाढले होते. वढू खुर्द येथे बिबट्याने गेल्या काही दिवसात २० पेक्षाही अधिक पाळीव प्राण्यांवर हल्ले केल्याने ग्रामस्थ भीतीच्या छायेत होते. याची दखल घेत वन विभागाने तातडीने कार्यवाही करीत ग्रामस्थांच्या मागणीनुसार बिबट्या पकडण्यासाठी पिंजरा लावला होता. गेले आठ दिवस तरुणांनीही बिबट्याचा वावर लक्षात घेत ठिकठिकाणी पिंजरा हलविण्यासाठी मदत केली होती. दरम्यान, मंगळवारी (ता. २३) सकाळी भंडलकर यांच्या शेतात बिबट्या पिंजऱ्यात अडकल्याचे नागरिकांच्या निदर्शनात आले. हा बिबट्या अंदाजे दोन वर्षे वयाचा असून त्याला निवारा केंद्रात सोडण्यात येणार असल्याचे वनविभागाकडून सांगण्यात आले. बिबट्याला पाहण्यासाठी बघ्यांची मोठी गर्दी जमली होती. दरम्यान, या परिसरात पोटफोडे वस्ती भागात दररोज तीन बिबटे नागरिकांना दिसत असल्याने आणखी पिंजरे लावण्याची मागणी सरपंच महेंद्र खांदवे, माजी सरपंच ज्ञानेश्वर चोंधे यांनी केली आहे.

पूर्व हवेली परिसरात नागरिकांच्या तक्रारीनुसार सात ते आठ ठिकाणी बिबट्याच्या वावराचा अभ्यास करून ट्रॅकिंग कॅमेरे व पिंजरे लावून बिबट्यास जेरबंद करण्यासाठी वनविभाग प्रयत्न करीत आहे. याच प्रयत्नामुळे मंगळवारी वढू येथे बिबट्या जेरबंद करण्यात यश आले असून लवकर उर्वरित ठिकाणीही बिबटे जेरबंद करण्यासाठी आवश्यक कार्यवाही करण्यात येईल.
- सुरेश वरक, वनपरिक्षेत्र अधिकारी, पुणे.


5266