बाजाभावातील घसरणीमुळे पेरू लागेना गोड

निमगाव केतकी, ता. १८ : पेरूच्या बाजारभावात प्रचंड मोठी घसरण झाली आहे. उत्पादन खर्च १६ रुपये आणि बाजारभाव मिळतोय प्रतिकिलो १५ रुपये. यामुळे जिल्ह्यामध्ये सर्वाधिक जास्त क्षेत्र असलेल्या इंदापूर तालुक्यातील हजारो पेरू उत्पादक शेतकरी हतबल झाले आहेत. शासनाने यामध्ये पेरूचे बाजारभाव वाढविण्याकडे लक्ष घालावे अशी मागणी पेरू उत्पादक शेतकरी करत आहेत.
राज्यासह जिल्ह्यांतील बाजारपेठांमध्ये पेरूची आवक मोठ्या प्रमाणात वाढली. दिल्ली, केरळ, हैदराबाद आदी ठिकाणी मागणी आहे. मात्र तेथे पाऊस सुरू असल्यामुळे पेरूच्या भावात या आठवड्यात मोठी घसरण झाले आहे. मिळणाऱ्या बाजारभावात उत्पादन खर्चही निघत नसल्याने शेतकरी हताश झाले आहेत.

वरकुटे खुर्द येथील पेरू उत्पादक प्रवीण शशिकांत शेंडे म्हणाले की, छाटणी खते औषधे फोम लावणे व तोडणी याचा हिशोब केला तर प्रतिकिलो १६ रुपये खर्च येतो. त्यामुळे पेरू प्रतिकिलो ३० रुपयांच्या पुढे विकला तर चार पैसे मिळतात. परंतु सध्या हा दर पंधरा रुपयांपेक्षा कमी झाला आहे. त्यातही व्यापारी खराब माल घेत नाहीत. त्यामुळे बाजारभाव आणखी तीन चार रुपयांनी कमी मिळतो. सध्या आपला पंधरा एकरातील मालाची तोडणी सुरू आहे. सध्या फक्त तोटा सहन करावा लागत आहे. शासनाने निर्यातीवरील शुल्क कमी केले तरी शेतकऱ्यांना चार पैसे दर जास्त मिळेल.

शेतकरी पेरुसह इतर फळांचे उत्पादन मोठ्या प्रमाणात घेत आहे. मात्र ठराविक शहरातच हा जातो. तो त्या राज्यातील तालुका पातळीपर्यंतच्या बाजारांपर्यंत पोहोचला तर शेतकऱ्यांना तोटा सहन करावा लागणार नाही. यासाठी शासन पातळीवर पेरूच्या हमीभावाबाबत कार्यवाही होणे गरजेचे आहे.
- आबासाहेब हेगडे, पेरू उत्पादक

एक एकर पेरूच्या बागेतील फळाला ५० हजार ते एक लाख एवढा फोम लागतो. इंदापूर बारामती व टेंभुर्णी या परिसरात होम तयार करणाऱ्या सुमारे ५० कंपन्या आहेत. जून व जुलै या महिन्यामध्ये साधारणपणे दररोज एक कोटी पेक्षा जास्त फोमची विक्री होत होती.हाच माल एका वेळी मोठ्या प्रमाणात सध्या सुरू झाल्याने दरात घसरण झाली आहे.
- अतुल शिंगाडे, फोम उत्पादक, शेळगाव (ता. इंदापूर)

पाऊस सुरू असल्याने मागणीत घट
स्थानिक व्यापारी अरुण सातव म्हणाले, पेरूला सर्वात जास्त मागणी दिल्ली केरळ व हैदराबाद येथे असते व सध्या येथे पाऊस सुरू असल्याने मागणी कमी असताना सध्या मालाची प्रचंड आवक वाढल्याने दरामध्ये घसरण झाली आहे. पेरूचा बारा महिने हंगाम धरता येतो. त्यामुळे शेतकऱ्यांनी एकदम छाटण्या न करता टप्प्याटप्प्याने छाटण्या केल्या तर एवढे दर ढासळणार नाहीत.
02855