इंदापुरातील शिक्षक पुरस्कार एकाच वेळी देणार ः गवळी

निमगाव केतकी, ता. ४ : इंदापूर तालुक्यातील गुणवंत शिक्षक (प्राथमिक) पुरस्कारांची तपासणी केल्यानंतर या वर्षीचे व मागील रखडलेले सर्व पुरस्कार एकाच वेळेस देण्यात येणार असल्याचे इंदापूर पंचायत समितीचे गटशिक्षणाधिकारी निलेश गवळी यांनी सांगितले.
शिक्षक दिनी (५ सप्टेंबर) तालुका, जिल्हा व राज्य स्तरावर शिक्षकांना गुणवंत शिक्षक पुरस्कार दिले जातात. तालुकास्तरावरील इंदापूर तालुक्यातील हे पुरस्कार मागील सहा वर्षांपासून दिले गेलेले नाहीत. या संदर्भात दैनिक सकाळने ६ जूनच्या अंकात ‘इंदापूर येथील शिक्षक पुरस्कारापासून वंचित’ या आशयाची बातमी छापली होती. तालुक्यातील २६ केंद्रामधून २६ पुरस्कार दरवर्षी देण्यात येतात. उद्या शिक्षक दिनानिमित्त शिक्षक पुरस्कारांची मागील यादी जाहीर करावी व पुरस्कार वितरित करण्यात यावेत अशी मागणी शिक्षक व शिक्षक संघटनांकडून होत आहे.
या पार्श्वभूमीवर, दोन महिन्यांपूर्वी नव्याने पदभार स्वीकारलेल्या गटशिक्षणाधिकारी गवळी यांना विचारले असता ते म्हणाले, ‘‘तालुक्यातील यावर्षीची गुणवंत शिक्षकांची तपासणी केल्यानंतर या वर्षीचे व मागील राहिलेले सर्व पुरस्कार एकाच कार्यक्रमामध्ये वितरित करण्यात येणार आहेत.’’