करंदीत बंद घराचे कुलूप तोडून चोरी

शिक्रापूर, ता. २२ : करंदी (ता. शिरूर) येथील भारत गॅस फाटा परिसरातील आकाश ठाकूर यांच्या घराचे कुलुप तोडून चोरट्यांनी दागिन्यांसह काही रोख रकमेची चोरी केली.
याबाबत शिक्रापूर पोलिसांनी माहिती दिली की, फिर्यादी आकाश रमेशसिंह ठाकूर (वय ३०) हे रविवारी (ता. १८) त्यांच्या घराला कुलूप लावून बाहेर गेले होते. दुसऱ्या दिवशी ते परत आपल्या घरी आले असता त्यांना त्यांच्या घराच्या दरवाजाला कुलुप नाही आणि दाराची कडी उचकटलेली दिसली. हे पाहून त्यांना घरात चोरी झाल्याचा संशय आला. त्यांनी उचकटलेली कडी काढून दरवाजा उघडला व घराची पाहणी केली असता घरातील सर्व साहित्य अस्ताव्यस्त पडल्याचे दिसून आले. त्यांनी आपल्या घरातील किमती ऐवज, दागिने तसेच काही रोख रक्कम स्वयंपाक घरातील डब्यांमध्ये ठेवलेली होती. हा संपूर्ण ऐवज चोरीला गेल्याचे त्यांच्या निदर्शनास आले. याबाबत त्यांनी शिक्रापूर पोलिस ठाण्यात फिर्याद दिली. त्यावरून पोलिसांनी अज्ञात चोरट्यांवर गुन्हा दाखल केला. पुढील तपास पोलिस हवालदार संदीप बनकर हे करत आहेत.