घातक औषधांची निर्मिती करणाऱ्या मालकासह तिघांवर गुन्हा दाखल

शिक्रापूर, ता.१३ : येथील प्रतिमा फार्मास्युटिकल्स या औषध निर्मिती कंपनीने मानवी आरोग्यास घातक असलेल्या २१ बनावट औषधे उप्तादित केली व पुण्यासह मुंबईत वितरित केल्याचे निष्पन्न झाले आहे. यामुळे कंपनी मालक डॉ. प्रतीक पंडित पलांडे यांच्यासह त्यांना मदत करणाऱ्या तिघांवर गुन्हे दाखल केले. याबाबत शिक्रापूर पोलिसांकडे अन्न आणि औषध प्रशासनाने रविवारी (ता.१३) फिर्याद दाखल केली आहे. सर्व आरोपी फरार असल्याचे पोलिसांनी सांगितले.
शिक्रापूर पोलिसांनी सांगितले की, अन्न-औषध प्रशासनाने मार्च २०२५ मध्ये वानवडी (पुणे) येथील एका हॉस्पिटलमधून काही बनावट औषधे पकडली होती. ही औषधे ही येथील प्रतिमा फार्मास्युटिकल्समध्ये बनविली गेल्याचे निष्पन्न झाल्यावर त्यांची चौकशी केली असता, कुठल्याच औषधे निर्मितीची परवानगी नसताना औषधे बविल्याचे उघडकीस आले. कंपनीने पुणे व मुंबई बाजारपेठेत ही सर्व २१ प्रकारची औषधे वितरित झाल्याची सखोल माहिती घेतली. पोलिसांनी त्यांच्याकडून ५५ लाख ६२ हजार ९३ रुपये आणि त्यासोबत काही कागदपत्रे जप्त केली. याप्रकरणी प्रशासनाकडून फार्मास्युटिकल्सला नोटीस बजावून त्यांची सुनावणी घेतली. डॉ.प्रतीक पलांडे यांनी नोटिशीमधील मुद्दे मान्य करून कंपनीमधील कच्चा माल, बिल, उत्पादित मालांचे रेकॉर्ड गहाळ झाल्याचे सांगितले. यावरून अन्न व औषध प्रशासनाचे निरीक्षक मनोज अय्या (वय ४५, रा.स्पाईन रोड, मोशी, पुणे) यांनी शिक्रापूर पोलिसांकडे फिर्याद दिल्यावरून डॉ. प्रतीक पलांडे, गुणवत्ता नियंत्रक संदीप क्षीरसागर, उत्पादन अधिकारी अंजन शेळके व रमेश डोमले (चौघेही रा.शिक्रापूर, ता.शिरूर) यांच्या विरुद्ध गुन्हा दाखल केला आहे.