पाबळमधील आरोपीस न्यायालयीन कोठडी

शिक्रापूर, ता. २० : विवाहितेला गुंगीचे औषध देवून तिच्यावर वारंवार बलात्कार करीत तिचे फोटो व व्हिडिओ काढून ब्लॅकमेल करणारा आणि तिच्याकडूनच वारंवार पैसे उकळणारा पाबळ (ता. शिरूर) येथील दत्तात्रेय बाळू फुटाणे या आरोपीला शिरूर न्यायालयाने नुकतीच न्यायलयीन कोठडी सुनावली. आरोपीने पीडिताच्या मुलालाही भाजी कापण्याच्या चाकूने गंभीर दुखापत केल्याने त्याच्यावर मारण्याचा गुन्हाही दाखल केला आहे.
याबाबत शिक्रापूर पोलिसांनी माहिती दिली की, आरोपी फुटाणे याने पिडितेस गुंगीचे औषध देवून तब्बल १५ महिने तिच्यावर लैंगिक अत्याचार केला. त्याने पिडीतेला ब्लॅकमेल करून तिला विविध ठिकाणी नेऊन तिच्यावर अत्याचार केला. तिच्यावर केलेल्या लैंगिक अत्याचाराचे फोटो व व्हिडिओ काढून तो वारंवार तिला ब्लॅकमेल करू लागल्याने आणि त्याबदल्यात पिडीतेकडून वारंवार पैसे वसुल करू लागल्याने पिडीतेने शिक्रापूर पोलिसांकडे तक्रार केली. यावर आरोपी फुटाने याने पिडीतेच्या मुलावर भाजी कापण्याच्या सुरीने हल्ला केला. याबाबत शिक्रापूर पोलिस ठाण्याचे पोलिस निरीक्षक दिपरतन गायकवाड यांनी गंभीर दखल घेऊन आरोपीस तत्काळ अटक केली. शिरूर न्यायालयाने आरोपीला तीन दिवसांची पोलिस कोठडी सुनावली. यात आरोपीने त्यावरील आरोप कबूल केले. शिरूर न्यायालयाने त्याला न्यायालयीन कोठडी सुनावल्याने त्याची रवानगी येरवडा कारागृहात केली. पुढील तपास फौजदार सोमनाथ कचरे करीत आहेत.