वासुलीफाटा येथील तलावात १४ वर्षीय मुलाचा बुडून मृत्‍यू

कुरुळी, ता. २५ ः वासुली फाटा (ता. खेड) येथे पोहण्‍यासाठी मित्रांसोबत तलावावर गेलेल्‍या एका १४ वर्षीय मुलाचा बुडून मृत्‍यू झाल्याची घटना मंगळवारी (ता. २३) सायंकाळी चार वाजता घडली. शेख सयलु गौस (वय १४, रा. वासुली फाटा, ता. खेड) असे बुडून मृत्‍यू झालेल्या मुलाचे नाव आहे. महाळुंगे एमआयडीसी पोलिस ठाण्‍याचे वरिष्‍ठ निरीक्षक दिगंबर सूर्यवंशी यांनी दिलेल्‍या माहितीनुसार, मंगळवारी दुपारी चार वाजण्याच्या सुमारास शेख सयलु गौस हा आपल्‍या मित्रांसोबत पोहण्‍यासाठी तलावावर गेला होता. मात्र, पोहता येत नसल्‍याने तो पाण्‍यात बुडाला. नागरिकांनी त्‍यास बेशुद्ध अवस्‍थेत चाकण येथील ग्रामीण रुग्‍णालयात दाखल केले असता, उपचारापूर्वीच त्‍याचा मृत्‍यू झाल्‍याचे डॉक्‍टरांनी घोषित केले. महाळुंगे एमआयडीसी पोलिस याबाबत अधिक तपास करीत आहेत.