जळोची उपबाजारामध्ये वाटाणा, डाळिंब तेजीत

काटेवाडी, ता. २६ : बारामती कृषी उत्पन्न बाजार समितीच्या जळोची उपबाजारात बुधवारी (ता.२५) झालेल्या शेतमाल लिलावात कांदा आणि बटाट्याने आवकेचा उच्चांक गाठला. एकूण १५८१ क्विंटल शेतमालाची आवक नोंदवली गेली. ज्यामध्ये कांद्याची ४८७ क्विंटल आणि बटाट्याची ५४० क्विंटल आवक सर्वाधिक होती. गोल्डन वाटाणा आणि डाळिंब यांनी बाजारात तेजी कायम राखली, तर टोमॅटो आणि कांद्याच्या बाजारात स्थिरता दिसून आली.
गोल्डन वाटाण्याची आवक पाच क्विंटल इतकी मर्यादित राहिली, तरी त्याला सरासरी १० हजार रुपये क्विंटल असा बाजारभाव मिळाला. डाळिंबानेही बाजारात चमक दाखवली. त्याने १० क्विंटल आवक आणि सरासरी १२,००० दरासह कमाल १५,००० पर्यंत मजल मारली. कांद्याची ४८७ क्विंटल बंपर आवक असूनही सरासरी दर १,२०० राहिला, तर बटाट्याची ५४० क्विंटल आवक आणि सरासरी २,००० दर नोंदवला गेला. टोमॅटोच्या १४ क्विंटल आवकाला सरासरी १,२०० बाजारभाव मिळाला. गवारची (पुणेरी) ११ क्विंटल आवक आणि सरासरी ८,००० दर मिळाला. इतर उल्लेखनीय शेतमालांमध्ये दोडका (१३ क्विंटल, सरासरी ७,०००) आणि वांगे (१३ क्विंटल, सरासरी ६,०००) यांनीही चांगला भाव मिळाला.