तरकारीच्या आवकेमध्ये जळोची बाजारात वाढ

काटेवाडी, ता. १३ : बारामती कृषी उत्पन्न बाजार समितीच्या जळोची उपबाजारात तरकारी पिकांची सध्या मोठी आवक पाहायला मिळत आहे. रविवारी (ता. १३) एकूण २,५६७.१० क्विंटल आवक झाली, यात सर्वाधिक १,५०० क्विंटल दोडक्याची आवक नोंदवली गेली, तर गावरान गवार आणि डाळिंबाला प्रतिक्विंटल सरासरी १२,००० रुपये किंमत मिळाली.
मुबलक पाण्याच्या उपलब्धतेमुळे फळभाज्या आणि पालेभाज्यांची लागवड मोठ्या प्रमाणात झाली आहे. याचा परिणाम म्हणून बाजारात तरकारी पिकांची आवक वाढली आहे. बारामती येथे दौंड इंदापूर, फलटण, माळशिरस व पुरंदरच्या काही भागातून फळभाज्या आणि पालेभाज्यांची आवक होत आहे. तसेच कोथिंबीर (१३५ क्विंटल), मेथी (८७ क्विंटल), आणि शेपू (३५ क्विंटल) यांचीही लक्षणीय आवक दिसून आली.