शासकीय कर्मचाऱ्यांना सोशल मीडिया वापरावर निर्बंध

काटेवाडी, ता. २९ : शासकीय कर्मचारी आणि अधिकाऱ्यांना आता वैयक्तिक सोशल मीडिया खात्यांवर गणवेशातील फोटो, रिल्स, शासकीय वाहन किंवा इमारतींचे व्हिडिओ टाकता येणार नाहीत. सामान्य प्रशासन विभागाने २८ जुलै २०२५ रोजी काढलेल्या नव्या परिपत्रकातून कर्मचाऱ्यांच्या सोशल मीडिया वापरावर कडक निर्बंध घातले आहेत. यामुळे शासकीय धोरणांवर टीकाटिपणीला बंदी आहेच, पण कर्मचाऱ्यांच्या ऑनलाइन वर्तनावरही ‘वॉच’ ठेवला जाणार आहे.
फेसबुक, एक्स, इन्स्टाग्राम, व्हॉट्सअॅप यासारख्या सोशल मीडिया माध्यमांमुळे माहिती जलद पसरते, पण याचमुळे गोपनीय माहितीचा गैरवापर, खोट्या बातम्या आणि शासकीय धोरणांवर बेताल टीका यासारख्या समस्या उद्भवतात. यावर नियंत्रण ठेवण्यासाठी सामान्य प्रशासन विभागाने नव्या मार्गदर्शक सूचना जाहीर केल्या आहेत. या नियमांचे उल्लंघन केल्यास महाराष्ट्र नागरी सेवा (वर्तणूक) नियम, १९७९ अंतर्गत शिस्तभंगाची कारवाई होईल.

कोणाला लागू होणार नियम
हे नियम महाराष्ट्र शासनाच्या सेवेतील सर्व कर्मचारी आणि अधिकाऱ्यांना, तसेच स्थानिक स्वराज्य संस्था, मंडळे, महामंडळे आणि सार्वजनिक उपक्रमांमधील कर्मचाऱ्यांना लागू होतील. यामध्ये करारपद्धतीने किंवा बाह्यस्त्रोताद्वारे नियुक्त कर्मचारी-अधिकाऱ्यांचाही समावेश आहे.

शिस्तभंगाला सामोरे जावे लागेल
सूचनांचे पालन न केल्यास कर्मचाऱ्यांवर महाराष्ट्र नागरी सेवा (शिस्त व अपील) नियम, १९७९ अनुसार कठोर कारवाई होईल. यामुळे कर्मचाऱ्यांना सोशल मीडियावर व्यक्त होताना आता काळजी घ्यावी लागणार आहे.

नव्या सूचना काय सांगतात
- वैयक्तिक सोशल मीडिया खात्यांवर शासकीय लोगो, गणवेश, वाहन किंवा इमारतींचे फोटो, रिल्स, व्हिडिओ टाकू नयेत.
- शासकीय धोरणांवर किंवा कृतींवर सोशल मीडियाद्वारे टीकाटिपणी करू नये.
- वैयक्तिक आणि कार्यालयीन सोशल मीडिया खाती वेगळी ठेवावीत.
- केंद्र किंवा राज्य शासनाने बंदी घातलेली वेबसाइट्‌स आणि अॅप्स वापरू नयेत.
- शासकीय योजना आणि उपक्रमांच्या प्रचारासाठी फक्त अधिकृत माध्यमांचा वापर करावा.
- कार्यालयीन समन्वयासाठी व्हॉट्सअॅप, टेलिग्राम यासारख्या अॅप्सचा मर्यादित वापर करता येईल.
- शासकीय कामगिरीचा प्रसार करताना स्वयंप्रशंसा टाळावी.
- आक्षेपार्ह, द्वेषमूलक किंवा मानहानिकारक मजकूर शेअर, अपलोड किंवा फॉरवर्ड करू नये.
- गोपनीय किंवा शासकीय कागदपत्रे मंजुरीशिवाय शेअर करू नयेत.
- बदलीनंतर कार्यालयीन सोशल मीडिया खाती व्यवस्थित हस्तांतरित करावीत.