जळोचीत टोमॅटोच्या बाजारभावात वाढ

काटेवाडी, ता. ९ : बारामती कृषी उत्पन्न बाजार समितीच्या जळोची उपबाजारात शनिवारी (ता.९) टोमॅटोच्या दरात लक्षणीय वाढ झाली. इतर बाजार समित्यांच्या तुलनेत बारामतीत टोमॅटोचे सरासरी दर २५०० प्रतिक्विंटल इतके स्थिर आहेत.
टोमॅटोच्या दरामध्ये दिवसेंदिवस सुधारणा होत असल्याने टोमॅटो उत्पादक शेतकऱ्यांमधून समाधान व्यक्त होत आहे. याशिवाय, बाजारात तरकारी मालाची एकूण १४२९ क्विंटल आवक नोंदवली गेली, ज्यामध्ये डाळिंबासह लसूण, आणि वाटाणा गोल्डन यांसारख्या प्रमुख शेतमालाचा समावेश आहे.
डाळिंब आणि लसूण यांच्या दरात चांगली स्थिरता दिसून आली, तर गवार आणि वाटाणा गोल्डन यांच्या भावामुळे शेतकऱ्यांना चांगला परतावा दिला. याशिवाय, बटाट्याची सर्वाधिक ५४० क्विंटल आवक नोंदवली गेली, बटाट्याचे सरासरी दर १५०० प्रतिक्विंटल राहिले. श्रावण महिन्यानिमित्त सरकारी भाजीपाल्याला ग्राहक वर्गातून मोठी मागणी आहे. परिणामी बाजारातील ही सकारात्मक स्थिती पुढील काही दिवस कायम राहण्याची शक्यता आहे.

प्रमुख भाजीपाल्याचे किमान व कमाल दर पुढीलप्रमाणे : डाळिंब : ६०००-२०,०००, लसूण/लोकल : २५००-७०००, वाटाणा गोल्डन : ५०००-७५००, गवार/गावरान : ६५००-१००००, शिमला मिरची : २०००-५०००, हिरवी मिरची/लोकल : २५००-५०००, टोमॅटो/लोकल : १०००-३०००, बटाटे : १०००-१६००, कोथिंबीर : ३००-५००, मेथी : ५००-१०००, गाजर/लोकल :१५००-४०००.