जनावरांचे लंपी प्रतिबंधात्मक लसीकरण करून घ्यावे

काटेवाडी, ता. १४ : ‘‘जिल्ह्यातील लंपी चर्मरोगाच्या प्रादुर्भावग्रस्त भागात उपचार, कीटक नियंत्रण व जनजागृती मोहीम सुरू आहे. पशुपालकांनी घाबरून न जाता जनावरांचे लंपी प्रतिबंधात्मक लसीकरण करून घ्यावे. पशुवैद्यकीय अधिकाऱ्यांच्या सूचनांचे पालन करावे,’’ असे आवाहन पशुसंवर्धन, दुग्धव्यवसाय विकास व मत्स्य व्यवसाय विभागाचे सचिव डॉ. रामास्वामी एन. यांनी केले आहे.

लंपीमुळे राज्यातील ९ हजार ८२० पशुधन बाधित असून सहा हजार ६१८ जनावरे उपचारानंतर बरी झाली आहेत. तर आतापर्यंत ३३९ जनावरांचा मृत्यू झाला आहे. शासनामार्फत तत्काळ व प्रभावी नियंत्रण उपाययोजना प्रभावीपणे राबविल्या जात आहेत. राज्यात ९३ टक्के पेक्षा जास्त गोवंशीय पशुधनाचे लसीकरण पूर्ण झाले आहे.
केंद्र शासनाकडील मार्गदर्शक सूचनांनुसार राज्यात गोट पॉक्सची विजातीय उत्तरकाशी स्ट्रेन लस दिली जात असून त्याचा परिणाम होऊन रोग प्रादूर्भाव कमी झाले आहेत. लंपी रोग प्रतिबंधक सजातीय लस वापरली गेली तर रोग नियंत्रणाकरिता अधिक परिणामकारक होईल. त्यामुळे या पुढील काळात लंपी चर्मरोगावर नियंत्रण आणण्यासाठी लंपी चर्म रोग प्रतिबंधात्मक लस निर्मितीचे तंत्रज्ञान भारतीय कृषी अनुसंधान परिषद नवी दिल्ली यांच्या अॅग्रीइन्नोवेट इंडिया या कंपनीकडून उपलब्ध करून घेतले असून, त्यामुळे पशुवैद्यकीय जैव पदार्थ निर्मिती संस्था, पुणे या पशुसंवर्धन विभागाच्या राज्यस्तरीय संस्थेमध्ये व्यावसायिक तत्वावर लसनिर्मिती लवकरच करण्यात येणार आहे.

पशुसंवर्धन विभागाने या रोग प्रादुर्भावाचा साथरोग विषयक अभ्यास करुन रोग प्रतिबंधक लसीकरणाचा समावेश मॉन्सून पूर्व लसीकरण कार्यक्रमामध्ये केला आहे. या करिता ११९ लक्ष लस मात्रा व आनुषंगिक साहित्याचा पुरवठा पावसाळा सुरू होण्यापूर्वी करण्यात आला आहे. लंपी चर्म रोगाबाबत पशुपालक तसेच पशुवैद्यकीय अधिकाऱ्यांना प्रशिक्षण देण्यात आले आहे.
-डॉ. प्रवीणकुमार देवरे