अमृत सरोवरांवर होणार ध्वजारोहण

काटेवाडी, ता. १३ : बारामती तालुक्यात स्वातंत्र्य दिनानिमित्त विशेष ध्वजारोहणाचा कार्यक्रम आयोजित करण्यात येणार आहे. ‘एक सरोवर, एक संकल्प जलसंवर्धनाचा’ या संकल्पनेसह जलसंधारण आणि पर्यावरण संवर्धनाला चालना देण्यासाठी हा उपक्रम राबवला जाणार आहे. अमृत सरोवर पाझर तलावांवर १५ ऑगस्ट रोजी ध्वजारोहणाचा कार्यक्रम होणार आहे. याबाबत संबंधित गावांना गटविकास अधिकारी किशोर माने यांनी सूचना दिल्या आहेत.
महात्मा गांधी राष्ट्रीय ग्रामीण रोजगार हमी योजनेच्या आयुक्तालयाच्या १ ऑगस्ट रोजीच्या पत्रानुसार, या कार्यक्रमासाठी विशेष तयारी करण्याचे निर्देश दिले आहेत. ध्वजारोहणासाठी प्रत्येक अमृत सरोवर स्थळी चबुतरा बांधणे, माहिती फलक लावणे आणि विविध उपक्रमांचे आयोजन करून स्वातंत्र्य दिन उत्साहात साजरा करण्याचे आवाहन केले आहे.
या कार्यक्रमात स्थानिक स्वातंत्र्यसैनिक, स्वातंत्र्योत्तर काळातील शहीदांचे कुटुंबीय किंवा स्थानिक पद्म पुरस्कारप्राप्त व्यक्ती यांच्या हस्ते ध्वज फडकावला जाईल. या मान्यवरांअभावी गावातील सर्वात ज्येष्ठ नागरिकाला हा मान देण्यात येईल. स्थानिक प्रतिनिधी, पर्यावरणप्रेमी, खेळाडू, युवक नेते, महिला बचत गट, विद्यार्थी आणि गावकरी यांचा या सोहळ्यात सक्रिय सहभाग असेल. या मान्यवरांचा योग्य सन्मान राखण्याचे निर्देशही दिले आहेत. ग्रामपंचायत अधिकाऱ्यांना नोडल अधिकारी म्हणून नेमण्यात आले असून, त्यांच्यासह ग्रामपंचायत कर्मचाऱ्यांना सहाय्यकाची जबाबदारी दिली आहे. ध्वजारोहणावेळी ध्वजसंहितेचे काटेकोर पालन करण्याची दक्षता घेण्याबरोबरच कार्यक्रमाचे छायाचित्रण, व्हिडिओ चित्रीकरण आणि वृत्तपत्र कात्रणे, तसेच त्यांच्या प्रती उपविभागीय कार्यालयात जमा करण्याचे निर्देश दिले आहेत. सर्व छायाचित्रे अमृत सरोवर मोबाईल अॅपवर अपलोड करणे आणि ग्रामपंचायत दप्तरी संग्रहित ठेवणे बंधनकारक आहे. हा कार्यक्रम जलसंधारणाचा संदेश गावागावांत पोहोचविण्याची संधी आहे. सर्वांनी उत्साहाने सहभागी होऊन हा सोहळा यशस्वी करावा, असे आवाहन केले आहे.

या गावांत होणार विशेष ध्वजारोहण
बारामती तालुक्यातील सुपा, बाबुर्डी, अंजनगाव, सोनवडी सुपे, मुर्टी, मोराळवाडी, उंडवडी क.प, मोढवे, जळगांव क.प, उंडवडी सुपे, कन्हेरी, कन्हेरी शेलार मळा, काळखैरेवाडी, मासाळवाडी, मुढाळे आणि भिलारवाडी येथील अमृत सरोवर पाझर तलावांवर ७८ स्वातंत्र्य दिनानिमित्त विशेष ध्वजारोहणाचा कार्यक्रम आयोजित करण्यात येणार आहे.