काटेवाडीत ‘मुख्यमंत्री समृद्ध पंचायतराज’चा प्रारंभ

काटेवाडी, ता. १७ : काटेवाडी (ता. बारामती) येथे ‘मुख्यमंत्री समृद्ध पंचायतराज’ अभियानाचा प्रारंभ बुधवारी (ता. १७) करण्यात आला. गटविकास अधिकारी किशोर माने यांच्या प्रमुख उपस्थितीत आयोजित ग्रामसभेत सर्व प्रमुख पदाधिकारी, सरपंच, उपसरपंच, ग्रामपंचायत सदस्य आणि ग्रामस्थ मोठ्या संख्येने उपस्थित होते. या वेळी प्लॅस्टिक कचऱ्याच्या विल्हेवाटीपासून ते गावाच्या स्वच्छतेपर्यंत विविध विषयांवर चर्चा झाली.
राज्यसभेच्या खासदार सुनेत्रा पवार यांनी फोनवरून गावकऱ्यांना मार्गदर्शन केले. “काटेवाडीने पुन्हा राज्यात प्रथम क्रमांक मिळवावा, यासाठी एकजुटीने काम करा,” असे आवाहन त्यांनी केले. गावकऱ्यांनीही लोकसहभागातून स्वच्छतेचे बक्षीस मिळवण्याचा संकल्प व्यक्त केला.
गटविकास अधिकारी किशोर माने यांनी प्लॅस्टिक कचऱ्याच्या विल्हेवाटीसाठी सूचना केल्या. त्यानुसार, स्थानिक दुकानदार अजित देवकाते यांनी तातडीने पुढाकार घेत रिकाम्या पाण्याच्या बाटलीत प्लास्टिक कचरा गोळा करून अभियानाची चांगली सुरुवात केली. यावेळी प्रशांत काटे, राजेंद्र पवार, अनिल काटे, हरिभाऊ मासाळ, शीतल काटे, रणजित गायकवाड, बाळासाहेब शिंदे यांच्यासह अनेक ग्रामस्थ उपस्थित होते.

स्थानिक दुकानदार अजित देवकाते यांनी ग्रामसभेतील सूचनांना तातडीने प्रतिसाद देत प्लॅस्टिक कचऱ्याचे संकलन सुरू केले. त्यांनी रिकाम्या पाण्याच्या बाटलीत प्लास्टिक कचरा गोळा करून इतरांसमोर आदर्श ठेवला आहे.