‘दौंड शुगर’ राबविणार एआय प्रणाली

खुटबाव, ता. २४ : दौंड शुगर कारखाना यंदा कार्यक्षेत्रातील पाच हजार हेक्टर ऊस क्षेत्रामध्ये एआय प्रणाली राबवणार, अशी माहिती दौंड शुगरचे संचालक वीरधवल जगदाळे यांनी व्यक्त केले.
खुटबाव (ता. दौंड) येथे दौंड तालुक्यामध्ये सर्वप्रथम ऊस शेती एआय प्रणाली राबवणाऱ्या महेंद्र थोरात यांच्या शेतीमध्ये दौंड शुगर कारखान्याच्या वतीने आयोजित कारखाना कामगारांच्या एआय प्रणाली प्रशिक्षण शिबिरामध्ये ते बोलत होते. यावेळी जगदाळे म्हणाले की, या शेतकऱ्यांना सलग तीन वर्षे शेतामध्ये एआय प्रणाली यंत्रणा कार्यान्वित करण्यासाठी २५ हजार रुपये खर्च अपेक्षित आहे. यासाठी शेतकऱ्यांनी स्वतः ९००० हजार रुपये भांडवल‌ गुंतवणे अपेक्षित आहे. यासाठी दौंड शुगर कारखान्याकडून परताव्याच्या बोलीवर ६००० रुपये भांडवल दिले जाईल. उर्वरित १० हजार रुपये खर्च वसंतदादा शुगर इन्स्टिट्यूट व महाराष्ट्र शासन करणार आहे. दौंड शुगर कारखान्याच्या वतीने एआय प्रणाली राबवणाऱ्या शेतकऱ्यांना मोफत प्रशिक्षण दिले जाणार आहे.
दरम्यान, बारामती ॲग्रिकल्चर डेव्हलपमेंट ट्रस्टचे संचालक प्रतापराव पवार यांनी ए आय शेती राबवण्यासाठी पुढाकार घेतला आहे.
यावेळी शेतकरी महेंद्र थोरात म्हणाले की, एक वर्षांपूर्वी सर्वप्रथम एआय ऊस शेतीचा प्रयोग केला. आज आडसाली ऊस ११ महिन्यांचा झाला असून एकरी १२५ टन उत्पन्न मिळेल असा अंदाज आहे.
यावेळी दौंड शुगर कारखान्याचे कार्यकारी संचालक शहाजी गायकवाड, ऊस अधिकारी दीपक वाघ, शेतकी अधिकारी संजय काकडे, ऊस विकास अधिकारी संदेश बेनके, गटप्रमुख विकास थोरात, भाऊसाहेब ढमढेरे, प्रशांत थोरात, दीपक होले आदी उपस्थित होते.

02572