पारगावमधील शेतकऱ्यांना वाळवा येथे अभ्यास दौरा

खुटबाव, ता. १७ : पारगाव (ता. दौंड) येथील शेतकऱ्यांनी कारंदवाडी (ता. वाळवा, जि. सांगली) येथील सुरेश कबाडे यांच्या ऊस शेतीचा अभ्यास दौरा केला. या भेटीमध्ये संतोष बोत्रे, कैलास ताकवले, विकास चोरमले, हरिदास ताकवणे, बाळासाहेब ताकवणे व‌ नागनाथ मुळीक या शेतकऱ्यांचा समावेश होता.
सुमारे सहा तासाच्या अभ्यासमध्ये शेतकऱ्यांनी कबाडे यांची ऊस शेती अभ्यासली. शेतकरी संतोष बोत्रे म्हणाले की, कबाडे यांनी ऊस लागवड करताना पाच बाय दोन फुटावर लागवड केली आहे. माती आडून खताचा डोस दिला आहे. प्रत्येक एकरामध्ये ४० हजार फुटव्यांची संख्या ठेवली आहे. प्रत्येक रोप एक समान वाढले आहे. लागवड ८० दिवसांची असली तरी पाच फूट ऊस वाढला आहे.
दरम्यान, कैलास ताकवले म्हणाले की, ऊस व्यवस्थापन कसे करावे हे कबाडे यांजकडून शिकता आले. एकरी १३० टन उत्पादन त्यांनी ऊसशेतीतून घेतले आहे. पारगाव येथे या ऊस शेतीचे अनुकरण आम्ही करणार आहोत. गेली पंधरा वर्षांपासून त्यांनी ऊस शेतीचे पाचट न जाळता शेतीमध्ये कुजवले आहे. दोन ऊस रोपांमध्ये सारखेच अंतर आहे. या शेतीचे‌ अनुकरण आम्ही करणार आहोत.