कुरकुंभ घाटात अखेर बसविले क्रॅश बॅरियर

सकाळ इम्पॅक्ट

कुरकुंभ, ता. ३१ : कुरकुंभ (ता. दौंड) येथील दौंड ते बारामती मार्गावरील कुरकुंभ घाटात डाव्या बाजूस क्रॅश बॅरियर नसल्याने अपघाताचा धोका निर्माण झाला होता. या पार्श्‍वभूमीवर अनेक दिवसांच्या प्रतीक्षेनंतर अखेर प्रशासनाकडून घाटात क्रॅश बॅरियर व तटबंदी बसविण्यात आली आहे.
औद्योगिक वसाहतीकडे मोठ्या प्रमाणात तरुण वर्ग व सर्वसामान्य नागरिक दररोज प्रवास करतात. तसेच या मार्गावरून अवजड व मोठी वाहतूकही सातत्याने सुरू असते. मात्र घाटाच्या शेवटच्या टोकाला सुरक्षेसाठी आवश्यक असलेली क्रॅश बॅरियर नसल्यामुळे अपघात होण्याची शक्यता वाढली होती.
या संदर्भात दैनिक सकाळच्या २२ डिसेंबरच्या अंकात घाटात तातडीने क्रॅश बॅरियर बसवण्याची गरज असल्याचे वृत्त प्रसिद्ध करण्यात आले होते. या वृत्ताची प्रशासनाने दखल घेत अखेर सुरक्षेची उपाययोजना पूर्ण केली. क्रॅश बॅरियर बसविल्याने आता प्रवाशांचा जीवितधोका कमी होणार असून नागरिकांनी प्रशासन व दैनिक सकाळचे आभार मानले आहेत.