अगोती नं. २ रस्ता २० वर्षांपासून दुरुस्तीच्या प्रतीक्षेत

लोणी देवकर, ता. ५ : अगोती नं. २ गावात (ता. इंदापूर) जाणारा मुख्य रस्ता मागील वीस वर्षांपासून पूर्णपणे दुर्लक्षित असून, रस्त्याची अत्यंत दयनीय अवस्था झाली आहे. वरकुटे बुद्रुक ते गंगावळण या मुख्य रस्त्यावरून गावात जाणाऱ्या या मार्गाचे डांबरीकरण २० वर्षांपूर्वी केले होते. त्यानंतर आजपर्यंत एकदाही दुरुस्ती केलेली नाही.

सध्या या रस्त्यावर सर्वत्र मोठमोठे खड्डे पडले असून रस्त्यावर डांबर आहे की नाही, हेच ओळखणे कठीण झाले आहे. या खराब रस्त्यामुळे स्थानिक ग्रामस्थ, शेतकरी, विद्यार्थी व वाहनधारकांना प्रचंड त्रास सहन करावा लागत आहे. गावचे ग्रामदैवत असलेल्या महादेवाचे मंदिराकडे जाण्यासाठी हा मुख्य रस्ता आहे. श्रावणात या मंदिराकडे जाताना भाविकांना नाहक त्रासाला सामोरे जावे लागत आहे. गावठाणात येणारा अंदाजे एक किलोमीटरचा रस्ता पूर्णपणे उखडलेला आहे आणि पावसाळ्यात या खड्ड्यांमध्ये पाणी साचल्यामुळे दुर्घटनेचा धोका वाढतो.

या रस्त्याचे डांबरीकरण माजी मंत्री हर्षवर्धन पाटील यांच्या विकास निधीतून केले होते, परंतु त्यानंतर गेली दोन दशके कोणतीही देखभाल अथवा सुधारणा झालेली नाही.
‘‘रस्त्याची दुरुस्ती तातडीने करून तो प्रवासयोग्य करावा,’’ अशी मागणी ग्रामस्थांकडून करण्यात येत आहे. तसेच शासनाने याकडे गांभीर्याने लक्ष देऊन लवकरात लवकर काम हाती घ्यावे, ही अपेक्षा आहे.