बनकरवाडीत अघोषित भारनियमन!

प्रतिक्रियेत अधिका-याचे नाव येणार आहे

लोणी देवकर, ता. ११ : इंदापूर तालुक्यातील बनकरवाडी येथील मागील तीन दिवसांपासून रात्री होत असलेल्या अनियमित व सततच्या विजेच्या लपंडावामुळे ग्रामस्थ त्रस्त झालेले आहेत. रात्री नऊ ते सकाळी नऊ असा १२ तासांसाठी वीजपुरवठा खंडित होत असल्याने अनेक प्रकारच्या गैरसोयींना ग्रामस्थांना सामोरे जावे लागत आहे. तरी वीजपुरवठा नियमित करून होणाऱ्या गैरसोयी टाळाव्यात, ही मागणी सागर बनकर यांच्यासह ग्रामस्थांच्या वतीने करण्यात येत आहे.
रात्रीच्या वेळी वीज नसल्यामुळे अंधाराचा फायदा घेत चोरी आणि इतर गुन्हेगारीच्या घटना वाढण्याची शक्यता असल्याने ग्रामस्थांमध्ये भीतीच वातावरण तयार झाले आहे. अनियमित वीज पुरवठ्यामुळे शेती सिंचनावर देखील परिणाम झालेला आहे. विद्यार्थ्यांच्या पायाभूत आणि घटक चाचणी परीक्षा सुरू असल्यामुळे रात्रीच्या वेळी मुलांना अभ्यास करणे किंवा ऑनलाइन शिक्षण घेणे शक्य होत नाही. गावोगावी श्रावण मासानिमित्त सप्ताहाचे आयोजन करण्यात आलेल्या असून रात्रभर वीजपुरवठा खंडित झाल्याने सप्ताहमध्ये अनेक अडचणींना सामोरे जावे लागत आहे. तरी महावितरणे या भागातील वीजपुरवठा सुरळीत कसा राहील याची दक्षता घेण्याची मागणी ग्रामस्थांच्या वतीने करण्यात आली आहे.

पावसामुळे मुख्य वाहिनीमध्ये काही तांत्रिक अडचणी येत आहेत. या अडचणींमुळे वाहिनीच्या तारा तुटण्याची भीती आहे. रात्री-अपरात्री कोणताही अनुचित प्रकार घडू नये यासाठी खबरदारी म्हणून वीजपुरवठा खंडित करत होतो. आता सर्व तांत्रिक अडचणी दूर करून वीजपुरवठा सुरळीत होईल, याची खबरदारी घेतली आहे.
-किरण गावडे, वीज तंत्रज्ञ, लोणी देवकर