राष्ट्रीय कुस्ती स्पर्धेसाठी ओम घोडकेची निवड

लोणी देवकर, ता. १५ : महाराष्ट्र राज्य क्रीडा संचालनालय व जि. प. क्रीडाअधिकारी सिंधुदुर्ग, यांनी संयुक्तरीत्या घेतलेल्या राज्यस्तरीय शासकीय कुस्ती स्पर्धेत वरकुटे बुद्रुक येथील ओम दीपक घोडके याने प्रथम क्रमांक पटकावून सुवर्णपदक मिळविले. रत्नागिरी येथे या स्पर्धा आयोजित केल्या होत्या. दिल्ली येथे होणाऱ्या राष्ट्रीय स्तरावर होणाऱ्या स्पर्धेसाठी त्याची निवड झाली असल्याने सर्व स्तरातून त्याचे कौतुक होत आहे.

क्रीडा संकुल रत्नागिरी येथे १४ वर्षे वयोगटाच्या आतील मुले व मुली यांची राज्यस्तरीय कुस्ती स्पर्धा आयोजित केल्या होत्या. त्या कुस्ती स्पर्धेत अभिनव माध्यमिक व उच्च माध्यमिक विद्यालय वाशिंबे या प्रशालेचा विद्यार्थी ओम याने (४१ किलो) वजनी गटात राज्यात प्रथम क्रमांक मिळवला असून त्याची दिल्ली येथे होणाऱ्या राष्ट्रीय कुस्ती स्पर्धेसाठी त्याची निवड झाली आहे. या राज्यस्तरीय कुस्ती स्पर्धेसाठी महाराष्ट्रातील एकूण आठ विभागांमधून प्रथम क्रमांक मिळविलेले कुस्तीपटू आले होते. आठ पैलवानांना हरवत ओमने प्रथम क्रमांक मिळवीत शाळेसह गावच्या नावलौकिकात भर टाकली.
ओम शेतकरी कुटुंबातील मुलगा असून आमचे वडील दीपक घोडके हे शेतकरी आहेत. ओमच्या कुस्तीमधील भवितव्यासाठी सर्वतोपरी प्रयत्न करणार असून ओम जागतिक पातळीवर देशाचे नाव कसे उंचावेल, यासाठी प्रयत्नशील राहणार असल्याचे दीपक घोडके यांनी सांगितले. ओमच्या या चमकदार कामगिरीत प्राचार्य महादेव झोळ, संस्थेचे अध्यक्ष आबासाहेब झोळ यांचे मोलाचे मार्गदर्शन लाभले आहे. या कामगिरीमध्ये प्रशालेचे क्रीडाशिक्षकांसह शिक्षक व शिक्षकेतर कर्मचारी यांचा सहभाग असून अशोक चोरमले, दत्तात्रेय गावडे यांच्या मार्गदर्शनाखाली ओम मागील दोन वर्षांपासून सराव करत आहे.