एसटी बस उपलब्ध न झाल्यामुळे मंचरमध्ये रास्ता रोको आंदोलन

मंचर, ता. २२ : आंबेगाव तालुक्याच्या पूर्व भागातील गावांसाठी एसटी बस उपलब्ध न झाल्यामुळे संतप्त प्रवाशांनी शनिवारी (ता. २१) संध्याकाळी मंचर येथे जुना पुणे- नाशिक राष्ट्रीय महामार्ग काही काळासाठी बंद करत रास्ता रोको आंदोलन केले. तब्बल चार तास बससेवेचा अभाव असल्याने प्रवाशांचा संताप अनावर झाला होता.
अवसरी बुद्रुक, अवसरी खुर्द, गावडेवाडी, मेंगडेवाडी, निरगुडसर, पारगावतर्फे अवसरी बुद्रुक, लोणी, धामणी, जारकरवाडी व शिरूर तालुक्यातील पाबळ या १४ गावांत जाणाऱ्या बस शनिवारी संध्याकाळी चारपासून रात्री आठ वाजेपर्यंत उपलब्ध नव्हत्या. त्यामुळे विद्यार्थ्यांचे शैक्षणिक नुकसान, महिलांची अडचण आणि ज्येष्ठ नागरिकांच्या हालाखीची स्थिती निर्माण झाली होती.
मंचर हे तालुक्याचे मध्यवर्ती ठिकाण असून येथून अंदाजे १०० गावांसाठी एसटी सेवा दिली जाते. मात्र, अलीकडील काळात काही मार्गावरील गाड्या नियमितपणे रद्द केल्या जात असल्याची प्रवाशांची तक्रार आहे. शनिवारी संध्याकाळी चार वाजता पाबळ व पारगावतर्फे अवसरी बुद्रुक या मार्गांवरील गाड्या वेळापत्रक असूनही न सोडता रद्द करण्यात आल्या. सव्वापाच वाजता येणारी ठाणे- लोणी एसटी रात्री सव्वानऊ वाजता, तर संध्याकाळी साडेसहा वाजता येणारी कल्याण- शिरूर एसटी रात्री साडेआठ वाजता आली. त्यामुळे प्रवासी ताटकळले होते. अखेर संतप्त नागरिकांनी बसस्थानकासमोरील रस्ता अडवून आपला आक्रोश व्यक्त केला. काही वेळ वाहतूक कोंडीही निर्माण झाली होती. प्रवाशांचा रोष लक्षात घेऊन वाहतूक नियंत्रकांनी तातडीने भीमाशंकर कारखानापर्यंत बससेवा उपलब्ध केली, त्यानंतर रात्री साडेआठ वाजता आंदोलन मागे घेण्यात आले.