एकलहरेत बिबट्याकडून पाळीव कुत्र्याची शिकार

मंचर, ता. २३ : एकलहरे (ता. आंबेगाव) येथे बागल वस्तीत बिबट्याने पाळीव कुत्र्याची शिकार केल्याची घटना घडली. ही थरारक घटना सीसीटीव्ही कॅमेऱ्यात कैद झाली आहे. त्यामुळे परिसरात भीतीचे वातावरण निर्माण झाले आहे. ही घटना रविवारी (ता. २२) मध्यरात्री एक वाजण्याच्या सुमारास अक्षय भरत शेलार यांच्या घरासमोर घडली. शेलार यांच्या दोन पाळीव कुत्र्यांपैकी एक कुत्रा बंगल्याच्या बाहेर असताना, बिबट्याने तारेच्या कंपाउंडवरून उडी मारून कुत्र्याची शिकार केली. दरम्यान, शनिवारी (ता.२१) सकाळी नऊच्या सुमारास शेलार यांच्या शेजारील शेतात बिबट मादी तीन बछड्यांसह फिरताना दिसली होती. परिसरात मोठ्या प्रमाणावर ऊस शेती आहे .येथील शेतकऱ्यांकडे गोठे आणि जनावरे मोठ्या संख्येने असल्याने पशुधनाच्या सुरक्षेचा प्रश्न ऐरणीवर आला आहे. यामुळे नागरिक व शेतकऱ्यांनी वनविभागाकडे बिबट्याला जेरबंद करण्यासाठी तातडीने पिंजरा लावण्याची मागणी केली आहे.