नियम पाळा अन्यथा कायदेशीर कारवाई करणार ः कंकाळ

मंचर, ता. २४ : ‘‘मंचर पोलिस ठाण्याच्या हद्दीतील हॉटेल, ढाबे, लॉजेस या आस्थापनांनी सुरक्षा संदर्भातील नियमांचे काटेकोर पालन करावे, अन्यथा कायदेशीर कारवाई केली जाईल,’’ असा इशारा मंचर पोलिस ठाण्याचे वरिष्ठ पोलिस निरीक्षक श्रीकांत कंकाळ यांनी दिला आहे.
मंचर (ता. आंबेगाव) पोलिस ठाण्यात हॉटेल, ढाबे व लॉजचे मालक व चालक यांची बैठक घेण्यात आली. या बैठकीस सहाय्यक पोलिस निरीक्षक सुनील बडगुजर उपस्थित होते. मंचर शहर व परिसरात भरदिवसा अनेक उभ्या असलेल्या चारचाकी वाहनाच्या काचा फोडून मोबाईल व रोख रक्कम चोरून नेल्याच्या घटना घडलेल्या आहेत. अनेक हॉटेल व्यावसायिकांच्या परिसरात सीसीटीव्ही कॅमेरे नाहीत, तसेच असलेले कॅमेरेही बंद आहेत. त्यामुळे चोरट्यांचा माग घेता येत नाही. याबाबत आवश्यक उपाययोजना तातडीने कराव्यात अशा सूचना कंकाळ यांनी दिल्या आहेत.

दृष्टीक्षेपात
हॉटेल, लॉज, ढाब्यातील कामगार, वेटर, सुरक्षा रक्षक यांची पोलिस चारित्र्य पडताळणी तत्काळ करून घ्यावी.
सर्व आस्थापनांनी ठरलेल्या वेळेत रात्री बंद करणे बंधनकारक आहे. वेळेपेक्षा उशिरा चालू ठेवणाऱ्यांवर कारवाई केली जाईल.
गाड्यांची तोडफोड व चोरीच्या घटनांवर नियंत्रण ठेवण्यासाठी सीसीटीव्ही, नाईट व्हीजन कॅमेरे बसवावेत.
आस्थापनांच्या बाहेर सुरक्षारक्षक नियुक्त करणे आवश्यक आहे. संशयित व्यक्ती दिसल्यास तत्काळ चौकशी केली जावी.