भीमाशंकर कारखान्याच्या कामाजावर आक्षेप : येवले

मंचर, ता. १३ : भीमाशंकर सहकारी साखर कारखान्यातील कामकाजावर प्रश्नचिन्ह उपस्थित करत, ‘कारखान्याचा आर्थिक ताळेबंद सर्वांना दिसतो, पण त्याचे आर्थिक विश्लेषण कोणी करत नाही,’ असे रमेश येवले यांनी एकलहरे (ता. आंबेगाव) येथे झालेल्या पत्रकार परिषदेत सांगितले.
ते म्हणाले, ‘‘मी सभासद नसल्याने वार्षिक सभेला गेलो नाही. ११ वर्षे काम करून सेवानिवृत्त झाल्यावर ते सांगतात, कारखान्याचे काम बरोबर नाही. एका व्यक्तीच्या हातात १०- २० वर्षे सत्ता देणे धोकादायक आहे. चांगल्या लोकांच्या हातात कारखाना द्या. दोन ते तीन वर्षात बदल करत जा. कारखान्याचा वापर राजकारणासाठी होत आहे. भाग विकास निधीतून घाट व रस्त्यांसाठी मोठ्या प्रमाणात पैसे देणे चुकीचे आहे. पैसे द्यायचे असतील तर स्वतःच्या पदरचे द्या. मोठ्या संस्थांनी राजकारणापासून शंभर हात दूर राहिले पाहिजे. संस्थेच्या पगारी कर्मचाऱ्यांचा वापरही राजकीय कामासाठी होऊ नये.”
माजी सहकारमंत्री दिलीप वळसे पाटील यांचा उल्लेख करत ते म्हणाले, ‘‘ते सुसंस्कृत व चरित्रवान नेते आहेत. त्यांनीही या कामात लक्ष घालावे व कठोर पावले उचलावीत. मला कोणावरही टीका करायची नाही.’’