पारगाव तर्फे खेड ग्रामस्थांकडून श्रमदान

मंचर, ता. २१ : पारगाव तर्फे खेड (ता. आंबेगाव) येथे ग्रामस्थांनी श्रमदानातून रस्त्यावरील खड्डे बुजवून रस्ता सुस्थितीत केला आहे. तब्बल दोन किलोमीटर लांबी व १२ फूट रुंदीचा रस्ता दुरुस्त झाल्यामुळे वाहनचालक व ग्रामस्थांनी समाधान व्यक्त केले.
पाच ते सहा वर्षांपूर्वी पारगाव चौक ते बेंडवस्ती या रस्त्याचे डांबरीकरण झाले होते. मात्र, नंतर कोणतीही दुरुस्ती न झाल्याने व सततच्या पावसामुळे रस्त्यावर ५०० हून अधिक खड्डे पडले होते. त्यामुळे पाण्याची डबकी तयार होऊन प्राथमिक व माध्यमिक शाळेतील विद्यार्थ्यांना त्रास होत होता. अनेक दुचाकींचे अपघातही घडले होते. या परिस्थितीवर उपाय म्हणून उद्योजक भाऊसाहेब सावंत पाटील व राजगुरुनगर रोटरी क्लबचे अध्यक्ष राजन जांभळे यांनी पुढाकार घेतला. रमेश सावंत पाटील यांनी जेसीबी व ट्रॅक्टर उपलब्ध करून दिले. ग्रामस्थांनी श्रमदानातून एका दिवसात रस्त्याची दुरुस्ती करून रस्ता वाहतुकीस योग्य केला.
या उपक्रमात सुरेश भागडे पाटील, उपसरपंच सुरेश अभंग, नवनाथ भालेराव, मोहन सावंत पाटील, प्रकाश चिखले, शंकरराव पवार, संभाजी महाराज भागडे, वसंत मनकर, काळूराम मनकर व ऋषिकेश अभंग यांच्यासह २५ जणांनी एक दिवस श्रमदान केले. लहान दगड, मुरूम टाकून सद्यःस्थितीत वाहतुकीसाठी रस्ता योग्य केला आहे.

14157