मंचरला अनोळखी मृतदेहाची ओळख पटविण्याचे आवाहन

मंचर, ता. १ : कळंब (ता. आंबेगाव) येथे पुणे- नाशिक महामार्गालगत ‘हॉटेल वंदन’समोर एक अनोळखी पुरुष झोपलेल्या अवस्थेत आढळला. त्यास उपचारासाठी उपजिल्हा रुग्णालय मंचर येथे आणले असता डॉक्टरांनी २० ऑगस्ट रोजी रात्री एक वाजण्यापूर्वीच मृत झाल्याचे घोषित केले. सदर मृत व्यक्तीचे नाव व पत्ता अद्याप समजू शकलेला नाही. आपला नातेवाईक बेपत्ता असल्यास संबंधितांनी सदर मृत व्यक्तीची ओळख पटण्यासाठी मंचर पोलिस ठाण्यात (०२१३३-२२३१५९) संपर्क करावा, असे आवाहन मंचर पोलिस ठाण्याच्या पोलिस उपनिरीक्षक रागिणी कराळे यांनी प्रसिद्धी पत्रकाद्वारे दिले आहे.
गेली सव्वा महिना पोलिस यंत्रणा आजूबाजूच्या परिसरात शोध घेत आहे. पण, मृताचे नातेवाईक अद्याप मिळालेले नाहीत. मृत व्यक्तीचे वर्णन- वय अंदाजे ४५ ते ५०, उंची ५ फूट ३ इंच, चेहरा उभट, नाक सरळ, केस लांब, काळे–पांढरे, बारीक, अंगात पांढऱ्या रंगाचा हाफ स्वेटर, त्यावर निळसर रंगाची चौकोनी नक्षी, राखाडी रंगाची फूल नाईट पँट (इलॅस्टिक), डाव्या हाताच्या कोपराजवळ जुनी जखम, डाव्या पायाच्या घोट्याच्या वर इसिंग पट्टी बांधलेली आहे.