बांगर दांपत्याचे जीवन समाजासाठी प्रेरणादायी

मंचर, ता. १५ : ‘‘शेतकरी महादू बांगर यांनी ९० व्या वर्षात, तर त्यांच्या पत्नी बाबाबाई बांगर यांनी ८५ व्या वर्षात पदार्पण केले आहे. विशेष बाब म्हणजे, या दोघांनाही आजवर दवाखान्याची पायरीही चढावी लागलेली नाही अन् काठीचा आधारही घ्यावा लागत नाही. आयुष्यभर शेती करीत, बकऱ्या-शेळ्या सांभाळून कुटुंबाचा उदरनिर्वाह करणाऱ्या या बांगर दांपत्याचा जीवनप्रवास समाजासाठी प्रेरणादायी ठरत आहे,’’ असे भीमाशंकर सहकारी साखर कारखान्याचे उपाध्यक्ष ॲड. प्रदीप वळसे पाटील यांनी सांगितले.
अवसरी फाटा (ता. आंबेगाव) येथील गोरक्षनाथ टेकडीवर आयोजित बांगर दाम्पत्याच्या सन्मान समारंभात ते बोलत होते. या वेळी कारखान्याचे अध्यक्ष बाळासाहेब बेंडे, तहसीलदार डॉ. सचिन वाघ, वरिष्ठ पोलिस निरीक्षक श्रीकांत कंकाळ, सहाय्यक पोलिस निरीक्षक सुनिल बडगुजर, सचिन भोर, विलास शिंदे आदी उपस्थित होते.
या प्रसंगी महादू बांगर म्हणाले की, ‘‘आतापर्यंत आम्ही अनेकांचा सत्कार पाहिला, मात्र आमचा सार्वजनिक क्षेत्रातील हा पहिलाच सत्कार आहे. या सन्मानामुळे आम्ही भारावून गेलो असून मनापासून आनंद झाला.’’ दादाभाऊ पोखरकर, अर्जुन थोरात, प्रियांका हिंगे, जयश्री वायकर, दीपक बांगर, रमेश खिलारी यांनीही मनोगत व्यक्त केले.