आचारसंहिता पालनाबाबत माळेगावात मार्गदर्शन

माळेगाव, ता. ८ : आदर्श आचारसंहिता पालन करून राज्य निवडणूक आयोगाने दिलेल्या आदेशानुसार माळेगाव (ता. बारामती) नगरपंचायतीची निवडणूक पार पाडण्यासाठी राजकीय पक्ष व उमेदवारांनी सहकार्य करावे, असे आवाहन निवडणूक निर्णय अधिकारी उज्ज्वला सोरटे यांनी केले.
माळेगाव नगरपंचायतीच्या पंचवार्षिक निवडणुकीच्या पार्श्वभूमीवर आदर्श आचारसंहिता पालन व उमेदवारी अर्ज दाखल करणे, या बाबतीत निवडणूक निर्णय अधिकारी सोरटे यांच्या मार्गदर्शनाखाली शनिवारी बैठक झाली. यावेळी त्या उपस्थितांशी संवाद साधताना बोलत होत्या. सहायक निवडणूक अधिकारी तथा मुख्याधिकारी बालाजी लोंढे, सहायक पोलिस निरीक्षक सचिन लोखंडे यांच्यासह विविध राजकीय पक्षाचे उमेदवार उपस्थित होते. या बैठकीत अनेक इच्छुक उमेदवारांनी विविध प्रश्न उपस्थित केले. या प्रश्नांना उपस्थित अधिकाऱ्यांनी उत्तरे दिली.
सोरटे म्हणाल्या, ‘‘निवडणूक आयोगाने दिलेल्या आदेशानुसार उमेदवारी अर्ज दाखल करणे, उमेदवार अर्ज दाखल करताना असलेल्या अटी व शर्ती, खर्च मर्यादा, प्रचार, बॅनर, सभा आदी विषयांवर लक्ष केंद्रित करणे आवश्यक आहे.’’