कोलाड रस्‍त्‍याची दुरवस्‍था

माले, ता. २७ ः मुळशी धरण भागातून जाणाऱ्या कोलाड रस्‍त्‍याची मोठ्या प्रमाणात दुरवस्‍था झाली आहे. योग्‍य देखभाल दुरुस्‍ती अभावी मोठ्या प्रमाणात रस्त्यावर खड्डे पडल्‍यामुळे रस्‍ता अनेक ठिकाणी धोकादायक झाला आहे.
रस्त्यावर पडलेल्या खड्ड्यांमुळे अपघात होत असून, स्‍थानिक नागरिकांसह पर्यटकांना याचा मोठा फटका बसत आहे. तातडीने रस्‍ता दुरुस्‍ती करावा, अशी मागणी प्रवासी व नागरिकांकडून होत आहे.
पावसाळा असल्‍याने वर्षाविहारासाठी आलेले पर्यटक, तसेच पुणे- कोकण प्रवास करणारे, स्‍थानिक ग्रामस्‍थांचे नादुरुस्‍त रस्त्यामुळे हाल होत आहेत. ठिकठिकाणी रस्‍त्‍याची दुरवस्‍था झाली आहे. डिसली गावाजवळ सिमेंट रस्‍त्‍याला भेगा पडल्‍या आहेत. पळसे येथे सिमेंटच्‍या रस्‍त्‍यात मोठा खड्डा पडला असून, त्‍यात गाड्या आपटून मोठे नुकसान होत आहे. ढोकळवाडी ओढ्याच्‍या पुलाजवळील वळणावर डांबरी रस्‍त्यावर खड्डा पडल्‍याने वाहनांचे अपघात होत आहेत. चाचीवली येथे डांबराचे प्रमाण चुकल्‍यामुळे रस्‍ता निसरडा होऊन वाहनांचा अपघात होत आहे.
डोंगरवाडी येथे एक वर्षापूर्वी खचलेल्‍या रस्‍त्‍याची अद्याप दुरुस्‍ती न केल्‍याने काही दिवसांपूर्वीच अॅसिड टॅंकरचा अपघात होऊन अॅसिड गळती झाली होती. डोंगरवाडी ते आदरवाडी रस्‍त्‍याची अत्‍यंत दुरवस्‍था झाली आहे.
रस्त्याच्या दुरुस्तीसाठी वेळोवेळी विविध पक्षांचे पदाधिकारी, स्‍थानिक लोकप्रतिनिधी यांनी शासनाकडे मागणी करूनही दुरुस्‍ती झाली नाही. शिवसेना ठाकरे गटाचे तालुका समन्‍वयक तथा मालेचे माजी सरपंच अनिल आधवडे, उद्योजक संदीप गुजर, दीपक जोरी, अनंता शेंडे आदींनी रस्‍त्‍याच्‍या दुरवस्‍थेची पाहणी करून तातडीने दुरुस्‍तीची मागणी केली आहे.