अल्पवयीन मुलीवर बापाकडून अत्याचार

पुणे, ता. २५ : माणुसकीला काळिमा फासणारी घटना मुळशी खुर्द येथे घडली आहे. स्वतःच्या अल्पवयीन मुलीवर वडिलांनीच दोन वेळा अत्याचार केल्याचे समोर आले. या प्रकरणी पोलिसांनी पोक्सो कायद्यान्वये गुन्हा दाखल केला आहे.
मिळालेल्या माहितीनुसार, बुधवारी (ता. १७) पहाटे घरातील सर्व सदस्य झोपलेले असताना आरोपी बापाने झोपलेल्या मुलीच्या खोलीत जाऊन तिच्यावर अत्याचार केला. मुलीने विरोध करताना आरडाओरडा करण्याचा प्रयत्न केला असता आरोपीने तिचे तोंड दाबून ठेवले. तसेच, हा प्रकार कुणाला सांगितल्यास तिला व तिच्या आईला जीवे मारण्याची धमकी दिली. त्यामुळे घाबरलेल्या मुलीने कोणालाही काही सांगितले नाही. यानंतर रविवारी (ता. २१) आरोपीने पुन्हा घरातील सदस्य झोपल्यानंतर मुलीला दुसऱ्या खोलीत नेऊन तिच्यावर दुसऱ्यांदा अत्याचार केला. पुढील दिवशी सकाळी अंघोळीच्या वेळी मुलीच्या कपड्यांवर डाग दिसल्याने आईला संशय आला. आईने चौकशी केल्यावर सुरुवातीला मुलगी उडवाउडवीची उत्तरे देत होती; मात्र विश्वासात घेतल्यावर तिने आपल्यावर झालेल्या अत्याचाराची माहिती आईला दिली. यानंतर आईने मंगळवारी (ता. २३) पोलिसांकडे धाव घेत फिर्याद दाखल केली. गुन्हा दाखल होणार असल्याची कल्पना लागताच आरोपी फरार झाला.