‘संपूर्ण एक दिवस मोरयासाठी’ मोरगावात प्रदक्षिणा सेवा संकल्प

मोरगाव, ता. ५ : तीर्थक्षेत्र मोरगाव येथे मोरगावकरांनी सामूहिक पद्धतीने पूरक पर्जन्यमान, उत्तम आरोग्य तसेच इच्छित मनोकामनापूर्तीसाठी ‘संपूर्ण एक दिवस मोरयासाठी’ ही संकल्पना राबवून अखंड श्री मयूरेश्वर प्रदक्षिणा सेवा संकल्प उपक्रम रविवारी (ता. ३) राबविण्यात आला.

असंख्य युवकांनी या प्रदक्षिणा सेवा संकल्पामध्ये सहभाग घेतला होता. विधिवत पूजा करून संकल्प करून पहाटे मंदिर उघडल्यापासून ते रात्री मंदिर बंद होईपर्यंत अखंड प्रदक्षिणा उपक्रम राबविण्यात आला.
या संपूर्ण उपक्रमाचे नियोजन जय गणेश प्रतिष्ठानच्या माध्यमातून केले होते. मोठ्या उत्साहाने अनेक युवक या उपक्रमात सहभागी झाले होते. मोरया मोरयाच्या गजरात संकल्प सोडून अखंड श्री मयूरेश्वर प्रदक्षिणा सेवा संकल्प केला. यापूर्वी मोरगावचा क्षेत्रपाल नग्न भैरवनाथ मंदिर व इतर द्वार मंदिरे या ठिकाणीही जय गणेश प्रतिष्ठानकडून विविध उपक्रम राबविले आहेत.
राज्याच्या वेगवेगळ्या भागातून दर्शनासाठी आलेले भाविकही युवकांच्या नवचैतन्य व उत्साहीपणामुळे भारावून गेले. ‘पर्जन्यवृष्टी होऊ दे, बळीराजा सुखावू दे’ अशी प्रार्थना करत भाविकही प्रदक्षिणा सेवा संकल्पमध्ये सहभागी झाले होते.