मोरगाव येथील ऐतिहासिक दसरा उत्सवाचे नियोजन

मोरगाव, ता. १९ : तीर्थक्षेत्र मोरगाव (ता. बारामती) येथे पारंपरिक विजयादशमी दसरा उत्सव २०२५ संदर्भात जय गणेश प्रतिष्ठान श्रीक्षेत्र मोरगाव यांची समन्वय बैठक रविवारी (ता. १७) येथील दत्त मंदिरात पार पडली. या बैठकीमध्ये पूर्ण दसरा उत्सवाचे नियोजन आखण्यात आले.
मोरगावचा ऐतिहासिक दसरा संपूर्ण राज्यात प्रसिद्ध असून येथे मोठ्या प्रमाणात शोभेच्या दारूची आतषबाजी व सलग १५ तास पालखी सोहळ्याची मिरवणूक असा पारंपरिक दसरा उत्सव असतो. येथे मोरगावकर श्री मयूरेश्वराच्या श्रद्धेमुळे सेवेकरी म्हणून पडेल ते काम करतात. या बैठकीसाठी युवकांचा मोठ्या प्रमाणात सहभाग होता.
या उत्सवात शोभेचे दारूकाम, इलेक्ट्रिक फायर शो, मोरया पालखी विसावा ओटा, मंदिर फूल डेकोरेशन, मंदिर व परिसर विद्युत रोषणाई, दृष्ट प्रवृत्ती प्रतिकृती, नगारखाना वाद्य दुरुस्ती, शामियाना, धर्म ध्वज अशा अनेक बाबींवर चर्चा करून नियोजन करण्यात आले. गेली १६ वर्षे जय गणेश प्रतिष्ठान दसरा उत्सवामध्ये निःस्वार्थ सेवा अविरतपणे बजावत आहे. यापुढेही प्रत्येकाने मयूरेश्वरासाठी या सोहळ्यात पडेल ते काम करून उत्सव चांगल्या पद्धतीने नियोजनपूर्वक साजरा करण्याचा निर्णय सर्वानुमते या बैठकीत घेण्यात आला.