ग्रामरोजगार सहाय्यकांच्या आंदोलनामुळे रोहयोची कामे ठप्प

मोरगाव, ता. ११ : शासन निर्णयानुसार ग्रामरोजगार सहाय्यकांना मानधन दिले नसल्याने बारामती तालुक्यातील ग्रामरोजगार सहाय्यक संघटनेने शासन जोपर्यंत मानधन देणार नाही तोपर्यंत काम बंद आंदोलन पुकारले आहे. या आंदोलनामुळे बारामती तालुक्यातील ९९ ग्रामपंचायतीमधील रोजगार हमीची सर्व कामे ठप्प झाली आहेत.
मंगळवार (ता. २) पासून हे आंदोलन सुरु करण्यात आले असून आज आंदोलनाचा नववा दिवस आहे. या आंदोलनामुळे बारामती तालुक्यातील प्रधानमंत्री आवास योजनेतील लाभार्थ्यांचे घरकुल मजुरीचे पैसे काढून देणे, वैयक्तिक सिंचन विहीर, जनावरांचा गोठा, फळबाग लागवड, वृक्षलागवड, फुलशेती, वैयक्तिक शेततळे, रेशीम उद्योग, कुकूटपालन शेड इत्यादी कामे ठप्प झालेली आहेत.
महात्मा गांधी राष्ट्रीय रोजगार हमी योजनेअंतर्गत प्रत्येक ग्रामपंचायतला ग्राम रोजगार सहायकांची नियुक्ती करण्यात आली असून शासनाच्या वतीने त्यांना देण्यात येणारे मानधन अत्यंत अल्प प्रमाणात असून ते कधीही वेळेवर मिळत नाही. अकरा महिन्यांचा कालावधी होऊनही ग्राम रोजगार सहाय्यकांना अजूनपर्यंत शासन निर्णयाप्रमाणे मानधन मिळालेले नाही.
याबाबत बारामती तालुक्यातील ग्राम रोजगार सहाय्यक संघटनेचे अध्यक्ष केशव तावरे यांनी ३ ऑक्टोबर २०२४ च्या शासन निर्णयानुसार जोपर्यंत मानधन मिळणार नाही तोपर्यंत बेमुदत काम बंद ठेवण्याचा निर्णय घेऊन आंदोलन पुकारलेले आहे. याबाबतचे निवेदन विधान परिषदेच्या उपसभापती डॉ. नीलम गोऱ्हे यांना देण्यात आले होते.
त्याविषयी ग्रामरोजगार सहाय्यक यांना सुधारित मानधन लागू करण्याबाबत शुक्रवारी (ता. १९) विधान भवन मुंबई येथे बैठक आयोजित केली असून त्यास उपस्थित राहण्याबाबत कळविण्यात आल्याची माहिती तावरे यांनी दिली. जोपर्यंत आमच्या मागण्या पूर्ण होत नाहीत तोपर्यंत आंदोलन असेच सुरू ठेवणार असल्याचेही त्यांनी सांगितले.