साकोऱ्यात एआय तंत्रज्ञानाद्वारे ऊस लागवड

महाळुंगे पडवळ, ता.२८ : भीमाशंकर सहकारी साखर कारखान्याच्या माध्यमातून साकोरे (ता.आंबेगाव) येथे प्रथमच प्रा.अनिल चिखले यांच्या शेतात कृत्रिम बुद्धीमत्ता (ए.आय) तंत्रज्ञानावर आधारित ऊस लागवड धोरण राबविण्यात आले आहे. शेतकऱ्यांनी विचारलेल्या प्रश्नांना कारखान्याचे शेतकी विभागातील अधिकाऱ्यांनी समर्पक उत्तरे दिली.
यावेळी कारखान्याचे कळंब गट प्रमुख महेंद्र वाळुंज म्हणाले की, उसाची लागवड करताना दोन रोपांमधील अंतर सुमारे दीड ते दोन फूट ठेवावे. लागवडीनंतर चार दिवसांनी बुरशीनाशक व कीटकनाशकाचा वापर करावा. वसंत दादा शुगर इन्स्टिट्यूटने विकसित केलेली औषधे आणि भीमाशंकर कारखान्याने जैविक प्रयोगशाळेत उत्पादित केलेली जीवाणू खतांचा वापर करावा. दत्तात्रेय गोविंदराव वळसे पाटील लक्ष २०२० च्या हेक्टरी १३० टन सरासरी ऊस उत्पादनाचे उदिष्ट असलेल्या महत्वाकांक्षी ऊस योजनेचा शेतकऱ्यांनी लाभ घ्यावा. शेतकऱ्यांनी पारंपरिक पद्धतीने ऊस लागवड करू नये. नर्सरीतील प्रामाणिक ऊस रोपांची लागवड, ठिबक सिंचनाचा अवलंब, एकात्मिक खत, तण आणि कीड व्यवस्थापनाचा अवलंब करावा.’’
कारखान्याचे संचालक अंकित जाधव म्हणाले, “कृत्रिम बुद्धीमत्ता तंत्रज्ञानावर आधारित ऊस शेती करणाऱ्या शेतकऱ्याना कारखान्यामार्फत वेळोवेळी मार्गदर्शन केले जाते. शेतकऱ्याच्या जीवनात खऱ्या अर्थाने आर्थिक बदल घडून आणण्याची किमया एआय तंत्रज्ञानामुळे शक्य आहे. त्यामुळे शेतकऱ्यांनी हे तंत्रज्ञान समजून घेऊन अवलंब करावा,’’
यावेळी सरपंच अनिल गाडे, भीमाशंकर कारखान्याचे संचालक बाजीराव बारवे, कारखान्याचे कर्मचारी अक्षय शेळकंदे, नितीन कोल्हे, प्रवीण घेवडे, अनिल गाडे, बबन गाडे यांच्यासह शेतकरी उपस्थित होते.
03222