नायगाव, पारगावात सायकलींचे वितरण

माळशिरस, ता. १९ : अक्षरसृष्टी संस्थेच्या वतीने पुरंदरमधील जिल्हा परिषद व माध्यमिक शाळांमध्ये सायकल बँक उपक्रम राबविण्यात येत आहे. या उपक्रमांतर्गत गुरुवारी (ता. २०) नायगाव येथे सहा, तर पारगाव येथे १६ सायकल वितरित करण्यात आल्या.
ज्या शाळेत विद्यार्थी संख्या १०० आहे, त्या शाळेसाठी किमान २५ सायकलींची बँक सुरू करण्यासाठी संस्था प्रयत्न करत आहे. जिल्हा परिषद प्रशासनाच्या आवाहनानुसार राजेवाडी (ता. पुरंदर) येथून हा उपक्रम सुरू करण्यात आला. दरम्यान, संस्थेच्या वतीने मागील दोन वर्षात माळशिरस, पिंगोरी, वाल्हे, हरणी, रिसे, पिसे, नायगाव, राजेवाडी, पारगाव, राजुरी, एखतपूर, मुंजवडी, खळद, वाळुंज, पांडेश्वर, पिंपरी, रोमनवाडी, पिसर्वे, मावडी, कुंभारवळण, यादववाडी, सटलवाडी, पिंपळे, जेऊर येथील शाळेत विविध देणगीदारांच्या सहकार्यातून एकूण १००० सायकलींचे वितरण संस्थेच्या माध्यमातून केले आहे. याचबरोबर दुर्गम भागात राहणाऱ्या विद्यार्थ्यांसाठी सोलर लॅम्पदेखील संस्थेच्या माध्यमातून देण्यात येत आहेत. यावेळी संस्थेचे अध्यक्ष सिद्धनाथ पवार, गटविकासअधिकारी प्रणोती श्रीश्रीमाळ आदी उपस्थित होते.
02713