हिरडस मावळातील प्रलंबित नागरीप्रश्नांसाठी कृती समिती

हिर्डोशी, ता. २८ : नीरा देवघर धरणग्रस्तांच्या प्रलंबित पुनर्वसनासह‌ हिरडस मावळातील रस्ते, शेती, रोजगार आदी प्रश्न मार्गी लावण्यासाठी हिर्डोशी (ता. भोर) येथे गुरुवारी (ता.२४) नियोजन बैठक झाली. यात हिरडस मावळातील नागरिकांनी विविध प्रश्न मांडले. ते सोडविण्यासाठी हिरडस मावळ कृती समितीची स्थापना करून अधिकृत नोंदणी करण्याचा निर्णय घेण्यात आला.
गेल्या दोन महिन्यांत नागरी प्रश्नांसंबंधी यापूर्वी साळव, गूढे या गावांतही बैठक झाली आहे. नीरा देवघर धरण होऊन पंचवीस वर्षे झाली. अद्याप प्रकल्प बाधितांचे प्रश्न सुटलेले नाहीत. पुनर्वसन, नीरा देवघर धरण रिंगरोड रुंदीकरण, महाड-पंढरपूर मार्ग रुंदीकरण कामातील ग्रामस्थांच्या समस्या, शेतकऱ्यांसाठीच्या शासकीय योजनांची अंमलबजावणी, दळणवळण, एसटी सेवा, शैक्षणिक आदी प्रश्नांविषयी बैठकीत चर्चा झाली. तसेच, हिरडस मावळातील संघटना, ग्रामस्थ, विविध क्षेत्रांतील पदाधिकारी यांची बैठक घेऊन कृती समितीच्या माध्यमातून प्रश्न सोडविण्यासाठी प्रयत्न करण्यात येणार आहे. १७ ऑगस्टला मावळातील प्रत्येक गावांत जाऊन सरपंच आणि ग्रामस्थांची भेट घेऊन जनजागृती करण्यात येणार आहे. पुढील काही दिवसांत कृती समितीची अधिकृत नोंदणी करण्यात येणार आहे. पुढील बैठक २३ ऑगस्टला वरवंड येथे होणार आहे. यासाठी कोणताही राजकीय हेतू न ठेवता सर्वांनी काम करण्याचा निर्णय सर्वानुमते घेण्यात आला.