उपचारासाठी तीन किलोमीटर झोळीतून पायपीट

महुडे, ता. १७ : बोपे (ता. भोर) येथील वाघमाची कचरे वस्तीला पक्का रस्ता नसल्याने अप्पाजी रामचंद्र कचरे या ६५ वर्षीय वृद्धाला उपचारासाठी घरापासून कापडी झोळीतून तीन किलोमीटरचा प्रवास करत पक्क्या रस्त्यापर्यंत ग्रामस्थांना न्यावे लागले. भोर तालुक्यातील काही वस्त्यांना पक्के रस्ते नाहीत. त्यामुळे वाहनव्यवस्था उपलब्ध होत नसल्याने नेहमीच पायपीट करावी लागत असून, प्रसुतीसाठी महिलेला, तर उपचारासाठी ज्येष्ठ व लहान मुलांना डाल अथवा कापडी झोळीतून घेऊन जावे लागत आहे. त्यात पावसाळ्यात अशा ठिकाणची परिस्थिती बिकट होत असल्याने नागरिकांचे हाल होत आहेत.
वाघमाची ते कुंबळे हा रस्ता मातीचा असल्याने पावसाळ्यात रस्त्यावरून वाहने जात नाही. त्यामुळे शुक्रवारी (ता. १५) संध्याकाळी घराजवळील अंगणात पाय घसरून पडलेल्या कचरे यांना पायाच्या दुखापतीवर उपचाराला जाण्यासाठी रात्र घरात बसून काढावी लागली. पक्क्या रस्त्यापर्यंत नेण्यासाठी शनिवारी (ता. १६) सकाळी दोन लाकडी वाशांना कापड बांधून बनवलेल्या झोळीचा वापर स्थानिकांना करावा लागला. मातीच्या निसरड्या वाटेने लाकडी वाशांना चौघांना खांदा देत पाऊणतास पायपीट करावी लागली. त्यानंतर पक्क्या रस्त्याहून त्यांना वाहनाने पुणे येथे उपचारासाठी नेण्यात आले. आजोबांना डांबरी रस्त्यापर्यंत आणण्यासाठी रामचंद्र कचरे, अनंता कचरे, बबन कचरे, शिवाजी गोरे, आनंद कचरे, धोंडिबा डोईफोडे, कोंडिबा कचरे, जानू कचरे, विठ्ठल कचरे, संतोष कचरे यांनी मदत केली. येथील ग्रामस्थांवर अशी पायपीट करण्याची वेळ नेहमी येत असते. त्यामुळे या त्रासाला कंटाळून काहीजण उपचार घेण्यास टाळाटाळ करून आजार अंगावरच काढतात.
बोपे हे भोर तालुक्यातील पश्चिम भागातील दुर्गम डोंगरी भुतोंडे खोऱ्यातील गाव आहे. तसेच, बोपेतील वाघमाची ही वाडी नदीच्या पलीकडे असून, कुंबळे गावापासून तीन किलोमीटर अंतरावर आहे. कुंबळे, चांदवणे व बोपे अशी ग्रुप ग्रामपंचायत आहे. वाघमाची येथे धनगर समाजातील आठ घरे वास्तव्यास असून, अंदाजे ६० लोकसंख्या आहे. चौथीपर्यंत प्राथमिक शाळा आहे. आरोग्यसेवेसाठी वेल्हे, नसरापूर किंवा सांगवी मार्गे भोरला यावे लागते. भुतोंडे आरोग्य केंद्रांच्या तरंगत्या दवाखान्यातून दिवाळीनंतर आठवड्यातून एकदा आरोग्य सेवा मिळते.

सुविधांचा अभाव
विजेची समस्याही वारंवार सतावत असते. उन्हाळ्याच्या शेवटी पाण्याची कमतरताही भासते. सुविधांचा अभाव असल्यामुळे येथील नागरिकांना नेहमीच यातना सहन कराव्या लागत आहेत. वाघमाची व घुमटवाडीसाठी पक्क्या रस्त्यासह इतर मूलभूत सुविधा उपलब्ध करून देण्याची मागणी बोपेतील रामचंद्र कचरे यांच्यासह स्थानिक नागरिकांनी केली आहे.