विद्यार्थ्यांनी कलाविष्कारांतून जिंकली प्रेक्षकांची मनं

हिर्डोशी, ता. १५ : भोर येथील विद्या प्रतिष्ठान संचलित इंग्लिश मिडियम स्कूलमध्ये शुक्रवारी (ता. १४) झालेल्या वार्षिक स्नेहसंमेलन कार्यक्रमात विर्द्याथ्यांनी विविध नृत्य सादर करीत उपस्थितांची मने जिंकली. नर्सरीच्या चिमुकल्यांसह दहावी पर्यंतच्या विद्यार्थ्यांनी आकर्षक पेहराव, लयबद्ध नृत्याने सर्वांची दाद मिळवली. प्रत्येक गटाने आपल्या सादरीकरणातून सामाजिक संदेश, सांस्कृतिकता आणि कला यांचा मोहक संगम घडविला.
भोर मधील यशवंत लॉन्स येथे आयोजित स्नेहसंमेलनाचे उद्‌घाटन भोरचे गटशिक्षणाधिकारी राजकुमार बामणे, उद्योजक यशवंत डाळ, कुस्तीपटू स्वप्नील शिंदे, संस्कार भारती अध्यक्षा शैलजा सावंत, पालक प्रतिनिधी सचिन घोणे, वर्षा झेंडे, मुख्याध्यापिका अश्विनी मादगुडे यांच्या उपस्थितीत झाले. त्यानंतर विद्यार्थ्यांनी ‘मूल्य शिक्षण’ या संकल्पनेवर आधारित क्रीडा, नृत्य व कलाविष्कार सादर केले. दरम्यान, इयत्ता दहावीच्या गुणवंत विद्यार्थ्यांचा प्रमाणपत्र व स्मृतिचिन्ह देऊन सन्मान करण्यात आला. तसेच क्रीडा, स्काऊट-गाईड, लोककला, नाट्य, संस्कृत पठण व विविध शैक्षणिक स्पर्धांमध्ये तालुका ते राज्यस्तरावर यश संपादन केलेल्या विद्यार्थ्यांचा गौरव करण्यात आला.
विद्यालयाच्या मुख्याध्यापिका अश्विनी मादगुडे यांच्या मार्गदर्शनाखाली सांस्कृतिक विभाग प्रमुख रागिनी भोसले, क्रीडा प्रमुख संतोष मादगुडे, कलाशिक्षक दत्तात्रय महांगरे, संगीत शिक्षक निवृत्ती खोपडे, आशा कदम, दिपाली भोसले, सचिन दानवले, रवींद्र जगदाळे, सर्व शिक्षक व शिक्षकेतर कर्मचारी यांनी कार्यक्रमाचे नियोजन केले. रवीका गवंडी यांनी सूत्रसंचालन केले. पालक, नातेवाईकांची कार्यक्रम पाहण्यासाठी गर्दी झाली होती.