वीसगाव खोऱ्यात बिबट्याचा वावर

हिर्डोशी, ता. १६ : भोर तालुक्यातील वीसगाव खोऱ्यातील नेरे, पाले, पळशोसी, वरोडी, बाजारवाडी, हातनोशी येथील शिवारात गेल्या चार दिवसांपासून भर दिवसा बिबट्याचा वावर आहे. त्यामुळे नागरिकांत भीतीचे वातावरण पसरले आहे. शेतकरी शेतातील कामे करण्यासाठी जात नाहीत. त्यामुळे शेती कामे रखडू लागली आहेत. तर नागरिकांनी घराबाहेर पडताना सतर्क राहण्याचे आवाहन वन विभागाकडून केले आहे.
तालुक्यात सध्या भात काढणीची लगबग असतानाच शिवारात वारंवार बिबट्या फिरताना दिसत असल्याने शेतात काम करण्यास जाणे शेतकऱ्यांकडून टाळले जात आहे. परिणामी भात काढणी तसेच रब्बीतील पेरणीची कामे रखडली असल्याचे शंकर शिंदे, सचिन पाटणे यांनी सांगितले. बिबट्याचा वावर असल्याची माहिती नागरिकांनी दिली असून त्यानुसार वनविभागाच्या कर्मचाऱ्यांनी परिसरात बिबट्याला शोधण्याचा प्रयत्न केला आहे. दरम्यान, बिबट्या दिसल्यास तत्काळ वन विभागाला कळवावे तसेच नागरिकांनी सतर्क राहावे असे आवाहन वनरक्षक संदीप शिवले व काशिम हिमोणे यांनी केले आहे.