‘रायगड, राजगड, तोरणा व रायरेश्वरला जोडणारा पर्यटन महामार्ग उभारावा’

हिर्डोशी, ता.१४ : शक्तीपीठ मार्गाच्या धर्तीवर रायगड, राजगड, तोरणा व रायरेश्वर किल्ले जोडणारा पर्यटन महामार्ग उभारावा, अशी मागणी आमदार शंकर मांडेकर यांनी गुरुवारी (ता. ११) मध्यरात्री नागपूर येथील हिवाळी अधिवेशनात केली.

महामार्गामुळे तीन तालुके एकमेकांना जोडणार असल्याने दुर्गम गावांना थेट जोडणी मिळेल आणि पर्यटनाला मोठी चालना मिळणार असून, स्थानिक अर्थव्यवस्थेला नवी दिशा मिळेल. दरम्यान सध्या हा भाग विकासापासून काहीसा दूर आहे. रस्ते पायाभूत सुविधा आणि वाहतूक व्यवस्थेअभावी पर्यटनाची क्षमता कमी पडते. हा महामार्ग उभारल्यास पर्यटकांची संख्या वाढेल, स्थानिकांना रोजगाराच्या नव्या संधी निर्माण होतील, परिवहनात आणि स्थानिकांच्या विविध व्यवसाय भर पडेल. सर्वात महत्त्वाचे म्हणजे शिवकालीन वारशासी जोडलेला हा पर्यटन मार्ग राज्याच्या ओळखीत महत्त्वाची भर घालणारा मार्ग ठरणार आहे.

शिवकालीन वारसा दुर्गसंवर्धन स्वराज्यभूमी, इतिहास पुण्यभूमी, गडकोटसंस्कृती ऐतिहासिक वारसा किल्ले यामुळे पर्यटनवाढीला चालना देत स्थानिकांचे राहणीमान उंचावण्यासाठी हा प्रकल्प जितक्या लवकर राबवला जाईल, तितका या परिसराचा सर्वांगीण विकास वेगाने होईल, असे आमदार मांडेकर यांनी सांगितले.