भोरमध्ये चोर महिलेस अटक

हिर्डोशी, ता. १६ : भोर एसटी बसस्थानकात पुण्याला जाण्यासाठी बसमध्ये चढत असताना महिलेच्या गळ्यातील दीड तोळ्याचे मंगळसूत्र चोरट्याने हिसकावून पलायन केल्याची घटना मंगळवारी (ता. १६) दुपारी दीडच्या सुमारास घडली. भोर पोलिसांनी शिताफीने करिष्मा करण सकट (रा. सायगाव, ता. उदगीर, जि. लातूर) या महिला चोरास चार वाजता पकडले.
फिर्यादी भरत रांजणे (रा. आंबाडे- कोळेवाडी, ता. भोर) यांची आई भोर- स्वारगेट बसमध्ये चढताना चोरट्याने गर्दीचा गैरफायदा घेत त्यांच्या गळ्यातील दीड तोळ्याचे १ लाख २० हजार रुपयांचे सोन्याचे मंगळसूत्र हिसकावून पलायन केले. मंगळसूत्र चोरी झाल्याचे लक्षात येताच त्यांनी मुलगा भरत यास कळविले. त्यांनी तत्काळ पोलिसांना माहिती दिली. पोलिस निरीक्षक अण्णा पवार यांच्या मार्गदर्शनाखाली पोलिस धर्मवीर खांडे, हेमंत भिलारे, वर्षा भोसले, अतुल मोरे, तसेच स्थानिक तरुण आकाश सागळे, जावेद आतार यांनी भोर बस स्थानकात सापळा रचून चोरट्यावर बारकाईने लक्ष ठेवत एक तासात मांढरदेवीला जाणाऱ्या खासगी वाहनात बसलेल्या संशयित महिलेला ताब्यात घेतले. पोलिसी खाक्या दाखवताच चोरट्या महिलेने चोरीची कबुली करून दीड तोळ्याच्या सोन्याचे पोलिसांकडे सुपूर्त केले. चोरट्याला तत्काळ पकडल्याने पोलिसांच्या कामगिरीचे कौतुक होत आहे.