हॉस्पिटलच्या दुसऱ्या मजल्यावरून उडी मारून रुग्णाची आत्महत्या

नारायणगाव, ता. २२ : वीज कोसळून दोन बांधकाम मजूर जखमी झाले. त्यातील सुनील कोल (वय २६, राहणार १४ नंबर, ता. जुन्नर, मूळ मध्यप्रदेश) याच्यावर मॅक्स केअर रुग्णालयात उपचार सुरु होते. त्याने रुग्णालयाच्या दुसऱ्या मजल्यावरुन उडी मारुन आत्महत्या केली.
आत्महात्येचे कारण समजू शकले नाही. ही घटना गुरुवारी दुपारी अकरा वाजण्याच्या सुमारास घडली. या प्रकरणी नारायणगाव पोलिसांनी आकस्मित मृत्यू अशी नोंद केली असल्याची माहिती नारायणगाव पोलिस ठाण्याचे सहाय्यक निरीक्षक महादेव शेलार यांनी दिली.
सुनील कोल व अमन राजमान कोल (वय १८) हे तरुण मध्यप्रदेश येथून रोजगारासाठी आले होते. ते १४ नंबर येथे वास्तव्यास होते. सोमवारी (ता. १९) दुपारी दोन वाजण्याच्या सुमारास पुणे नाशिक महामार्गावरून नारायणगाव येथून १४ नंबर येथे ते घरी जात होते.
यावेळी महामार्गावर वीज कोसळली होती. त्यांची प्रकृती गंभीर असल्याने आणि त्यांचे कुटुंबीय मध्यप्रदेश येथे असल्याने मानवतेच्या भावनेतून उपसरपंच योगेश पाटे यांनी त्यांना येथील रुग्णालयात उपचारासाठी दाखल केले. डॉ. प्रतीक पाटील यांच्या मार्गदर्शनाखाली अतिदक्षता विभागात त्यांच्यावर तीन दिवस उपचार करण्यात आले. उपचारानंतर अमन कोल याला घरी सोडण्यात आले. मात्र
सुनील कोल याच्यावर उपचार सुरू होते. उपचार सुरू असतानाच गुरुवारी सकाळी अकरा वाजण्याच्या सुमारास रुग्णालयाच्या दुसऱ्या मजल्यावरून त्याने उडी मारली. या घटनेत त्याच्या तोंडाला गंभीर दुखापत झाल्याने तो बेशुद्ध झाला. उपचार सुरु असतानाच त्याचे निधन झाले. याबाबत डॉ. प्रतीक पाटील म्हणाले, सुनील कोल व्यसनाधीन होता. तीन दिवस दारू न मिळाल्यामुळे
तो अस्वस्थ होता. आत्महत्या करण्यामागे व्यसनाधीनता हे कारण असू शकते.