मांजरवाडीतील दोघांना खूनप्रकरणी कारावास

नारायणगाव, ता.१९ : किरकोळ कारणावरून अंगावर पेट्रोल टाकून पेटवून देऊन खून केल्याप्रकरणी नारायणगाव पोलिस ठाण्यात मे २०१९ मध्ये गुन्हा दाखल असलेल्या मांजरवाडी येथील दोन आरोपींना अतिरिक्त जिल्हा व सत्र न्यायालय जुन्नर यांनी आजन्म कारावास व २५ हजार रुपये दंड, अशी शिक्षा दिली आहे, अशी माहिती तपासी अधिकारी, तथा नारायणगाव पोलिस ठाण्याचे तात्कालिक पोलिस निरीक्षक अर्जुन घोडे पाटील यांनी दिली.

मांजरवाडी येथील रशीदभाई जाफरभाई तांबोळी (वय ५५) यांना पेटवून देऊन खून केल्याप्रकरणी ऋषिकेश पोपट लोखंडे (वय २६),किरण कानिफनाथ जाधव (वय २५, दोघेही राहणार मांजरवाडी ,ता.जुन्नर, जि.पुणे) यांना जिल्हा व सत्र न्यायाधीश एस. एस.नायर यांनी शिक्षा दिली आहे.सरकारी वकील म्हणून विकास देशपांडे व गोकूळ खोडे यांनी काम पहिले.जिल्हा कोर्ट पैरवी अधिकारी म्हणून पोलिस निरीक्षक संतोष घोळवे, फौजदार शशिकांत खरात यांनी काम पहिले.

घटनेची हकीकत: मांजरवाडी येथील रशीदभाई तांबोळी यांच्या घरासमोरील रस्त्याच्या काँक्रीटीकरणाचे काम जून २०१९ मध्ये झाले होते. या रस्त्यावरून आरोपी ऋषिकेश लोखंडे याने मोटरसायकल नेल्यामुळे रस्ता खराब झाला होता. नवीन रस्ता खराब होत असल्याने या रस्त्यावरून मोटरसायकल घेऊन जाऊ नको.असा सल्ला रशीदभाई तांबोळी यांनी आरोपी ऋषिकेश लोखंडे याला दिला होता. या कारणावरून त्याने रशीदभाई यांना शिवीगाळ व धक्काबुक्की केली होती. याचा राग मनात ठेवून १५ मे २०१९ रोजी रात्री एक वाजण्याच्या सुमारास ऋषिकेश लोखंडे, किरण जाधव हे रशीदभाई तांबोळी यांच्या घराजवळ आले. त्यावेळी ऋषीकेश लोखंडे याने आणलेल्या बाटलीतील पेट्रोल तांबोळी यांच्या अंगावर टाकले. यामुळे आरडाओरडा करून तांबोळी तेथून पळत असताना खाली पडले. दरम्यान किरण जाधव याने त्यांना पेटवले. या घटनेत तांबोळी गंभीर भाजले होते. नारायणगाव येथील खासगी रुग्णालयात उपचार सुरू असताना २५ मे २०१९ रोजी रशीदभाई यांचे निधन झाले. या प्रकरणी शोएब रशीदभाई तांबोळी यांनी दिलेल्या फिर्यादीवरून नारायणगाव पोलिस ठाण्याचे तत्कालीन पोलिस निरीक्षक अर्जुन घोडे पाटील यांनी आरोपींना अटक करून खुनाचा गुन्हा दाखल केला होता.