टोमॅटो उपबाजाराच्या वेळेत एक जुलैपासून होणार बदल

नारायणगाव, ता. २८: शेतकऱ्यांनी केलेल्या मागणीनुसार जुन्नर कृषी उत्पन्न बाजार समिती अंतर्गत नारायणगाव येथील टोमॅटो उपबाजाराच्या वेळेत बदल करण्यात आला आहे. टोमॅटो खरेदी विक्रीचे व्यवहार एक जुलैपासून सकाळी ८ ते दुपारी ३ या वेळेत करण्यात येणार आहेत, अशी माहिती बाजार समिती सभापती संजय काळे यांनी दिली.
याबाबत काळे म्हणाले की, स्थानिक शेतकऱ्यांसह पारनेर, अकोले, संगमनेर, आंबेगाव, खेड, बीड, बारामती, इंदापूर, शिरूर, पारनेर या भागातील शेतकरी नारायणगाव उपबाजार टोमॅटो विक्रीसाठी येतात. मागील काही दिवसापासून टोमॅटोची आवक वाढली आहे. कोरोनाच्या पार्श्वभूमीवर शेतकऱ्यांनी केलेल्या मागणी नुसार २०१९ पासून टोमॅटो बाजाराच्या वेळेत बदल करण्यात आला होता. त्यानुसार सकाळी सात वाजल्यापासून टोमॅटोचे खरेदी विक्रीचे व्यवहार सुरू होत असत. बाजारात येण्यासाठी शेतकऱ्यांना घरून पहाटेच निघावे लागते. मात्र, यामुळे इतर तालुक्यातील शेतकऱ्यांची गैरसोय होत आहे. यामुळे शेतकऱ्यांनी केलेल्या मागणीनुसार एक जुलैपासून वेळेत बदल केला आहे. टोमॅटो उपबाजारात शेतकरी व व्यापाऱ्यांसाठी स्वच्छतागृह, स्नानगृह, पिण्याचे स्वच्छ पाणी, अल्पदरात भोजनाची आदी सुविधा निर्माण केले आहेत. शेतकरी व व्यापाऱ्यांची काही अडचण असल्यास बाजार समिती कार्यालयात संपर्क साधावा, असे आवाहन काळे यांनी केले आहे.