हिवरेतर्फे नारायणगावात शेतकऱ्याची आत्महत्या

नारायणगाव, ता. ५ : हिवरेतर्फे नारायणगाव (ता. जुन्नर) येथून बेपत्ता झालेल्या मारुती विष्णू वाळुंज (वय ५६) या शेतकऱ्याचा मृतदेह वारूळवाडी (ता. जुन्नर) येथील मीना नदीकाठालगत असलेल्या विहिरीत मंगळवारी (ता. ५) दुपारी आढळून आला. या व्यक्तीने आत्महत्या केली असल्याचा प्राथमिक अंदाज नारायणगाव पोलिसांनी व्यक्त केला आहे.
मारुती वाळुंज हे २ ऑगस्ट रोजी हिवरेतर्फे नारायणगाव येथून घरातून निघून गेले होते. याबाबतची तक्रार त्यांच्या कुटुंबीयांनी नारायणगाव पोलिस ठाण्यात दिली होती. दरम्यान, मंगळवारी दुपारी त्यांचा मृतदेह विहिरीत आढळून आला. सहाय्यक पोलिस निरीक्षक महादेव शेलार यांच्या मार्गदर्शनाखाली पोलिस उपनिरीक्षक विनायक दडस पाटील, पोलिस कॉन्स्टेबल सत्यम केळकर, शुभम खांडगे, गंगाधर कोतकर, सुनील औटी, मास्टर ट्रेनर सुशांत भुजबळ, हिवरेतर्फे नारायणगावचे पोलिस पाटील विलास खोकराळे, किरण शिंदे, किरण मोरे यांनी मृतदेह विहिरीतून बाहेर काढला. वाळुंज यांच्या मागे पत्नी, दोन मुले,एक मुलगी असा परिवार आहे.