नारायणगावात कृषिसेवक मेहेर यांच्या प्रतिमेचे पूजन

नारायणगाव, ता. १२ : कृषी, व्यापार, शिक्षण व सामाजिक क्षेत्रातील विकासात कृषिसेवक घमाजी मनाजी मेहेर ऊर्फ अप्पासाहेब मेहेर यांचे योगदान मोठे आहे. स्वातंत्र्यपूर्व काळात मुंबई येथे केळी व्यापाराच्या माध्यमातून कृषिसेवा करून त्यांनी राज्यातील केळी उत्पादक शेतकऱ्यांना आधार दिला. त्यांचे समाज उपयोगी कार्य प्रेरणादायी आहे, असे मत शिवसेनेचे तालुकाप्रमुख, नारायणगावचे माजी सरपंच योगेश पाटे यांनी व्यक्त केले.

नारायणगाव (ता. जुन्नर) येथे गुरुवर्य रा.प.सबनीस विद्यामंदिर व कनिष्ठ महाविद्यालयात दानशूर व्यक्तिमत्त्व मेहेर यांच्या ६१ व्या पुण्यतिथीनिमित्त येथील कार्यक्रमाचे आयोजन केले होते. यावेळी पाटे बोलत होते. ते पुढे म्हणाले की, मेहेर यांचे मीना नदीवरील पूल व प्राथमिक आरोग्य केंद्र उभारणीत मोठे योगदान आहे. मुंबईत मराठी माणसाला ताकद देण्याचे त्यांनी काम केले. यामुळेच भायखळा येथील बाजारपेठेला घमाजी मानाजी मेहेर मार्केट असे नाव देण्यात आले आहे.
यावेळी मेहेर यांच्या प्रतिमेचे पूजन उपस्थित मान्यवरांच्या हस्ते करण्यात आले. कार्यक्रमाच्या अध्यक्षस्थानी ग्रामोन्नती मंडळाचे कार्याध्यक्ष, कृषिरत्न अनिल मेहेर होते. या वेळी ग्रामोन्नती मंडळाचे विश्वस्त प्रकाश पाटे, मोनिका मेहेर, उपाध्यक्ष शशिकांत वाजगे, संचालक अरविंद मेहेर, रत्नदीप भरवीरकर, एकनाथ शेटे, ऋषिकेश मेहेर, देवेंद्र बनकर, देविदास भुजबळ, सुखदेव बनकर, ऋतुपर्ण मेहेर, प्राचार्य डॉ. आनंद कुलकर्णी, उपप्राचार्य हनुमंत काळे, प्रशांत शेटे, संतोष वाजगे, सुशांत भुजबळ, विकास तोडकरी, विद्यार्थी व शिक्षक उपस्थित होते.
मुख्याध्यापिका सुषमा वाळिंबे यांनी प्रास्ताविक केले. भाग्यश्री वाव्हळ यांनी सूत्रसंचालन तर पर्यवेक्षक संजय वलटे यांनी आभार मानले.

07026